Read nynorsk 2011 Salmane 83 Bible Online

Salmane 83 - nynorsk 2011 bible

Salmane 83

¹Ein song. Ein salme av Asaf.

² Gud, hald deg ikkje i ro, ver ikkje still og tagal, Gud!

³ Fiendane dine buldrar! Dei som hatar deg, lyfter hovudet.

⁴ Dei legg listige planar mot ditt folk, dei held samråd mot dei du vernar.

⁵Dei seier: «Kom, lat oss sletta dei ut som folk, så Israels namn ikkje blir hugsa meir!»

⁶Dei held råd og blir samde, dei lagar ei pakt mot deg,

⁷ [120] Edoms telt og ismaelittane, Moab og hagrittane,

⁸ [121] Gebal, Ammon og Amalek, Filistarland og dei som bur i Tyros,

⁹ [122] jamvel Assur sluttar seg til dei og er ein sterk arm for Lots søner. Sela

¹⁰ Gjer med dei som med Midjan, som med Sisera og Jabin ved Kisjon-bekken.

¹¹Dei vart utrydda ved En-Dor, vart til gjødsel på marka.

¹² Lat fyrstane deira bli som Oreb og Seeb, alle hovdingane som Sebah og Salmunna!

¹³For dei sa: «Vi vil ta Guds beitemarker i eige.»

¹⁴ Min Gud, lat dei bli som tisteldun, som halmstrå for vinden!

¹⁵ Som elden brenner opp ein skog og logane set fjell i brann,

¹⁶slik må du jaga dei med din storm og skremma dei med dine stormkast.

¹⁷ Fyll andletet deira med skam så dei spør etter ditt namn, HERRE.

¹⁸Lat dei bli slegne av skam og skrekk for alltid, lat dei bli vanæra og gå til grunne!

¹⁹ Måtte dei skjøna at ditt namn er HERREN, einast du er Den høgste over all jorda.