Read nynorsk 2011 Salmane 85 Bible Online

Salmane 85 - nynorsk 2011 bible

Salmane 85

¹Til korleiaren. Av Korah-songarane. Ein salme.

² HERRE, du har vist godvilje mot landet ditt, du vende lagnaden for Jakob.

³ Du tok bort skulda til folket ditt, dekte over all deira synd. Sela

⁴ All din harme tok du tilbake, du vende deg om frå din brennande vreide.

⁵Før oss tilbake, Gud, vår frelsar, lat din uvilje mot oss ta slutt!

⁶ Vil du vera harm på oss for alltid og la vreiden vara frå slekt til slekt?

⁷Er det ikkje du som vekkjer oss til liv på nytt så folket ditt kan gleda seg i deg?

⁸Lat oss få sjå di miskunn, HERRE, gjev oss di frelse!

⁹ Eg vil høyra kva Gud HERREN seier. For han talar fred til sitt folk, til sine trugne, — berre dei ikkje vender attende til dårskap!

¹⁰ Ja, hans frelse er nær for dei som fryktar han, så herlegdom skal bu i landet vårt.

¹¹ Miskunn og sanning skal møta kvarandre, rettferd og fred skal kyssa kvarandre.

¹² Sanning skal spira opp av jorda og rettferd sjå ned frå himmelen.

¹³ HERREN skal gje det som godt er, og landet vårt skal bera si grøde.

¹⁴ Rettferd går framføre når han dreg fram.