Read nynorsk 2011 Salmane 86 Bible Online

Salmane 86 - nynorsk 2011 bible

Salmane 86

¹Ei bøn av David. Vend øyret til, HERRE, svar meg, for eg er hjelpelaus og fattig!

² Vakta meg, for eg er trugen. Frels din tenar, du min Gud, eg set mi lit til deg.

³Ver meg nådig, Herre, eg ropar til deg heile dagen.

⁴ Gjer din tenar glad! Eg lyfter mi sjel til deg, Herre.

⁵ For du, Herre, er god, du tilgjev, du er rik på miskunn mot alle som kallar på deg.

⁶ HERRE, vend ditt øyre til mi bøn, lyd etter når eg bed om nåde!

⁷ Den dagen eg er i naud, ropar eg til deg, for du vil svara meg.

⁸ Herre, mellom gudar er ingen som du, og ingen gjerningar er som dine.

⁹ Alle folk som du har skapt, skal koma og bøya seg for deg, Herre, og æra ditt namn.

¹⁰ For du er stor, og du gjer under. Einast du er Gud.

¹¹ HERRE, lær meg din veg så eg kan ferdast i di sanning! Gjev meg eit heilt hjarte, så eg fryktar ditt namn!

¹²Eg vil prisa deg, Herre, min Gud, av heile mitt hjarte og evig æra ditt namn.

¹³ For di miskunn mot meg er stor, frå djupaste dødsriket har du berga meg.

¹⁴ Frekke menn har reist seg mot meg, Gud, ein flokk av valdsmenn står meg etter livet. Dei har ikkje deg for auga.

¹⁵Men du, Herre, er ein mild og nådig Gud, sein til vreide, rik på miskunn og sanning.

¹⁶Vend deg til meg og ver meg nådig. Gjev din tenar kraft frå deg, frels sonen til di tenestekvinne!

¹⁷Gjev meg eit teikn som varslar godt. Lat dei som hatar meg, sjå det og bli til skamme! For du, HERRE, hjelper og trøystar meg.