Read nynorsk 2011 Salmane 88 Bible Online

Salmane 88 - nynorsk 2011 bible

Salmane 88

¹[128] Ein song. Ein salme av Korah-songarane. Til korleiaren. Etter «Mahalat leannot». Ein læresalme av esrahitten Heman.

² HERRE, du Gud som frelser meg, eg ropar til deg dag og natt.

³Lat mi bøn nå fram til deg, vend øyret til mitt rop!

⁴Mitt liv er fylt av ulukker, eg står ved dødsrikets rand.

⁵Eg blir rekna til dei som har gått i grav, eg er som ein mann utan kraft.

⁶Eg er forlaten mellom dei døde, lik falne som ligg i grav. Du kjem dei ikkje lenger i hug, dei er støytte bort frå di hand.

⁷ Du har lagt meg i hòla der nede, i det mørke djupet.

⁸ Din harme kviler tungt på meg, du lèt dine brotsjøar slå over meg. Sela

⁹ Du har drive venene mine bort og fylt dei med avsky for meg. Eg er stengd inne, eg kjem ikkje ut,

¹⁰ auget veiknar i mi naud. HERRE, eg ropar til deg kvar dag, eg retter hendene ut mot deg.

¹¹ Gjer du under for dei døde, står daudingar opp og prisar deg? Sela

¹²Fortel dei om di miskunn i grava, om din truskap i avgrunnen?

¹³Blir dine under kjende i mørkret, di rettferd i det gløymde landet?

¹⁴ Eg ropar til deg, HERRE, kvar morgon kjem mi bøn fram for deg.

¹⁵ Kvifor støyter du meg bort, HERRE, kvifor løyner du andletet for meg?

¹⁶Frå ungdomen av har eg vore hjelpelaus, ja, døden nær. Du fyller meg med redsle, eg er rådvill.

¹⁷Din harme slår over meg, dine redsler gjer ende på meg.

¹⁸Dei er omkring meg som vatn heile dagen, alle saman omringar meg.

¹⁹Du har drive vener og frendar bort frå meg, mine kjenningar er borte i mørkret.