Read nynorsk 2011 Salmane 89 Bible Online

Salmane 89 - nynorsk 2011 bible

Salmane 89

¹Ein læresalme av esrahitten Etan.

² Eg vil alltid syngja om HERRENS miskunn, frå slekt til slekt skal min munn gjera din truskap kjend.

³Eg seier: Miskunn blir bygd for evig, din truskap er grunnfest i himmelen.

⁴ «Eg gjorde ei pakt med min utvalde, svor ein eid til David, min tenar:

⁵Eg grunnfester di ætt til evig tid; eg vil byggja di trone frå slekt til slekt.» Sela

⁶ Himmelen prisar dine under, HERRE, forsamlinga av dei heilage prisar din truskap.

⁷ [129] For kven i skyene er HERRENS like, kven mellom gudesøner er som HERREN,

⁸ ein stor og skremmande Gud i rådet av dei heilage, meir verd å frykta enn alle som omgjev han?

⁹Kven er som du, Gud HERRE Sebaot? Mektig er du, HERRE, omgjeven av din truskap.

¹⁰ Du herskar over det hovmodige havet, når bølgjene reiser seg, stiller du dei.

¹¹ [130] Det var du som slo Rahab i hel, du spreidde dine fiendar med din mektige arm.

¹² Din er himmelen, og di er jorda, du har grunnlagt verda og alt som fyller henne.

¹³ [131] Du skapte nord og sør, Tabor og Hermon jublar over ditt namn.

¹⁴Din arm er mektig, di hand er sterk, høgre arm er lyft.

¹⁵ Rettferd og rett er grunnvoll for di trone, miskunn og sanning kjem fram for deg.

¹⁶ [132] Sælt er det folket som kan ropa av jubel. Dei ferdast i lyset frå ditt andlet, HERRE.

¹⁷Heile dagen jublar dei over ditt namn, dei triumferer ved di rettferd.

¹⁸Du er deira styrke og prakt, ved din godvilje får vi kraft.

¹⁹ Skjoldet vårt høyrer HERREN til, kongen vår høyrer Israels Heilage til.

²⁰ Den gong tala du i eit syn til dine trugne: «Eg set ein helt til å hjelpa, reiser opp ein utvald frå folket.

²¹ Eg fann David, min tenar, eg salva han med mi heilage olje.

²²Mi hand skal alltid vera hos han, min arm skal gje han styrke.

²³Fienden skal ikkje plaga han, vonde menneske skal ikkje kua han.

²⁴Eg knuser motstandarar framfor han, dei som hatar han, slår eg ned.

²⁵Min truskap og mi miskunn skal vera hos han, i mitt namn skal han få kraft.

²⁶ Eg legg havet under hans hand, elvane under hans høgre arm.

²⁷ Han skal ropa til meg: ‘Du er min far, min Gud, mitt berg som frelser meg!’

²⁸ Ja, min førstefødde skal han vera, den høgste mellom kongane på jord.

²⁹Eg skal alltid gjera godt mot han, mi pakt med han står fast.

³⁰Hans ætt held eg oppe til evig tid, hans trone så lenge himmelen er til.

³¹ Dersom sønene hans går bort frå mi lov og ikkje følgjer mine bod,

³²dersom dei vanhelgar mine forskrifter og ikkje held mine påbod,

³³då straffar eg deira brot med stokk, deira synd med slag.

³⁴Men eg skal ikkje ta mi miskunn frå han og ikkje svikta min truskap.

³⁵ Eg vil ikkje vanhelga mi pakt, ikkje endra orda frå min munn.

³⁶Éin gong for alle har eg svore: Så sant eg er heilag, eg vil aldri lyga for David.

³⁷ Hans ætt skal vara til evig tid, hans trone skal stå som sola framfor meg.

³⁸Ho skal stå fast for evig som månen, det trufaste vitnet i skya.» Sela

³⁹ Men du har støytt bort den du har salva, du vraka han og vart harm på han.

⁴⁰Du har gjort om inkje pakta med din tenar, vanhelga hans krone i støvet.

⁴¹ Du har rive ned alle hans murar, lagt borgene hans i grus.

⁴² Dei plyndrar han, alle som fer framom, han har vorte til spott for sine grannar.

⁴³Du gjev motstandarane siger og gjer alle hans fiendar glade.

⁴⁴Hans kvasse sverd har du trekt tilbake, du heldt han ikkje oppe i striden.

⁴⁵Du har gjort ende på hans glans og slengt trona hans til jorda.

⁴⁶Du har korta hans ungdoms dagar og sveipt han i skam. Sela

⁴⁷ Kor lenge, HERRE? Vil du løyna deg for alltid? Kor lenge skal din harme brenna som eld?

⁴⁸ Kom i hug at livet mitt er kort! Var det fåfengt at du skapte alle menneske?

⁴⁹ Kven lever utan å sjå døden, kven bergar livet frå dødsrikets vald? Sela

⁵⁰Herre, kvar er di miskunn som du viste oss før, den du svor David i din truskap?

⁵¹Herre, kom i hug spotten mot dine tenarar, den eg har fått i fanget frå mange folk.

⁵²For dine fiendar spottar, HERRE, dei spottar den du har salva, kvar han går.

⁵³Velsigna er HERREN til evig tid! Amen! Ja, amen!