Read nynorsk 2011 Salmane 9 Bible Online

Salmane 9 - nynorsk 2011 bible

Salmane 9

¹[15] Til korleiaren. Etter «Mut labbén». Ein salme av David.

² Eg vil takka deg, HERRE, av heile mitt hjarte. Eg vil fortelja om alle dine under.

³Eg vil gleda og fryda meg i deg. Eg vil lovsyngja ditt namn, du Høgste.

⁴Når mine fiendar dreg seg attende, snublar dei og går til grunne framfor deg.

⁵ For du har gjeve meg rett i mi sak, du har sett deg på trona, du rettferdige dommar.

⁶ Du truga folka og utsletta dei lovlause, du strauk namnet deira ut for evig.

⁷Fienden er borte, lagd i ruinar for alltid, byar har du rive opp med rot; minnet om dei er ikkje meir.

⁸ Men HERREN tronar til evig tid, til dom har han reist si trone.

⁹ Han dømmer verda med rettferd, feller rettferdig dom over folka.

¹⁰ HERREN er eit vern for dei undertrykte, eit vern når dei er i naud.

¹¹ Dei som kjenner ditt namn, set si lit til deg. HERRE, du forlèt ikkje dei som søkjer deg.

¹² Syng for HERREN, han som bur på Sion, fortel om hans gjerningar mellom folka!

¹³ Han som straffar drap, gløymer ikkje; han hugsar dei hjelpelauses skrik.

¹⁴ [16] Ver meg nådig, HERRE! Sjå kor uvenene mine plagar meg. Du fører meg opp frå dødens portar

¹⁵ [17] så eg kan lovprisa deg i Sions portar. Eg vil jubla over di frelse!

¹⁶ Folka fell i den grava dei grov, føtene blir fanga i garnet dei sjølve spente ut.

¹⁷ [18] HERREN gjev seg til kjenne, han kjem med rettferd. I sine eigne gjerningar blir den lovlause fanga. Higgajon. Sela

¹⁸Dei lovlause skal fara til dødsriket, alle folkeslag som gløymer Gud.

¹⁹ Den fattige blir ikkje gløymd for alltid, dei hjelpelause er ikkje for alle tider utan von.

²⁰ Reis deg, HERRE! Lat ikkje menneske få makta, lat folka få sin dom for ditt andlet.

²¹Fyll dei med redsle, HERRE! Lat folka skjøna at dei berre er menneske. Sela