Read nynorsk 2011 Salmane 91 Bible Online

Salmane 91 - nynorsk 2011 bible

Salmane 91

¹Den som sit i skjul hos Den høgste og finn nattely i skuggen av Den veldige,

² han seier til HERREN: «Mi tilflukt og mi borg, min Gud som eg set mi lit til!»

³ Han bergar deg frå fuglefangarens snare, frå pest som legg i øyde.

⁴ Under hans venger kan du søkja ly, med fjørene dekkjer han deg. Hans truskap er skjold og vern.

⁵Du skal ikkje frykta for redsler i natta, for piler som flyg om dagen,

⁶for pest som fer fram i mørkret, for plage som herjar ved middagstid.

⁷Om tusen fell ved di side, ti tusen ved di høgre hand, blir du ikkje råka.

⁸ Du skal berre følgja det med auga og sjå at dei skuldige får si løn.

⁹ «Du, HERRE, er mi tilflukt.» Den høgste har du gjort til din bustad.

¹⁰Det skal ikkje henda deg noko vondt, inga plage skal koma nær ditt telt.

¹¹ For han skal gje englane sine påbod om å verna deg på alle dine vegar.

¹²Dei skal bera deg på hendene så du ikkje støyter foten mot nokon stein.

¹³ Du skal trø på løve og slange og trampa på ungløve og orm.

¹⁴«Eg bergar han når han held seg til meg, eg vernar han, for han kjenner mitt namn.

¹⁵ Når han kallar på meg, svarar eg, eg er med han i nauda, eg friar han ut og gjev han ære.

¹⁶ Eg mettar han med eit langt liv og lèt han sjå mi frelse.»