Read nynorsk 2011 Salmane 92 Bible Online

Salmane 92 - nynorsk 2011 bible

Salmane 92

¹Ein salme. Ein song for sabbatsdagen.

² Det er godt å takka HERREN og lovsyngja ditt namn, du Høgste,

³å kunngjera di miskunn om morgonen, din truskap om nettene,

⁴til den tistrengja harpa, til linne tonar frå lyra.

⁵ HERRE, du har gledd meg med ditt verk, eg jublar over det dine hender har gjort.

⁶ Kor store dine gjerningar er, kor djupe dine tankar, HERRE!

⁷Den uforstandige forstår ikkje dette, dåren skjønar det ikkje:

⁸ Dei urettferdige skyt opp som gras, alle som gjer urett, blømer, berre for å bli rydda ut for alltid.

⁹ Men du, HERRE, er opphøgd til evig tid.

¹⁰ Dine fiendar, HERRE, dine fiendar skal gå til grunne, alle som gjer urett, skal spreiast.

¹¹ Du gjev meg kraft som ein villokse og salvar meg med den friskaste olje.

¹² Eg kan følgja fienden med auga, eg kan høyra om valdsmenn som reiste seg mot meg.

¹³ Dei rettferdige skyt opp som palmar, dei veks seg høge som sedrar på Libanon.

¹⁴Dei er planta i HERRENS hus og blømer i føregardane hos vår Gud.

¹⁵Enno i alderdomen ber dei frukt, dei er friske og frodige.

¹⁶ Slik forkynner dei at HERREN er rettvis. Han er mitt berg, det er ingen urett hos han.