Read nynorsk 2011 Salmane 94 Bible Online

Salmane 94 - nynorsk 2011 bible

Salmane 94

¹ HERRE, du er ein Gud som tek hemn. Stig fram i stråleglans, hemnens Gud!

² Reis deg, du som dømmer jorda, lat dei hovmodige få det dei fortener!

³ [134] Kor lenge, HERRE? Kor lenge skal dei urettferdige jubla?

⁴ Dei talar ein straum av frekke ord, alle som gjer urett, skryter.

⁵Dei knuser folket ditt, HERRE, og kuar din eigedom.

⁶ Enkjer og innflyttarar drep dei, og farlause myrdar dei.

⁷ Dei seier: «HERREN ser det ikkje, Jakobs Gud merkar det ikkje.»

⁸De uforstandige i folket, merk dykk dette! Dårar, når skal de forstå?

⁹ Høyrer ikkje han som planta øyret, ser ikkje han som forma auget?

¹⁰Refsar ikkje han som tuktar folka, han som gjev menneska kunnskap?

¹¹ HERREN kjenner tankane til menneska, han veit at dei er tomme.

¹² Sæl er den du tuktar, HERRE, den du underviser i di lov.

¹³Du vil gje han ro utan vonde dagar til grava er graven for den lovlause.

¹⁴ HERREN støyter ikkje frå seg sitt folk og forlèt ikkje sin eigedom.

¹⁵Retten skal igjen bli rettferdig, og alle ærlege av hjartet skal leva etter den.

¹⁶Kven står opp for meg mot valdsmenn, kven stig fram for meg mot dei som gjer urett?

¹⁷ [135] Om ikkje HERREN var min hjelpar, budde eg snart i det stille landet.

¹⁸Om eg må seia: «Foten min er ustø», så held di miskunn meg oppe, HERRE.

¹⁹Når mitt indre er fullt av urolege tankar, har mi sjel glede av di trøyst.

²⁰ [136] Kan vondskaps trone vera din ven, ho som gjer urett til lov?

²¹Dei slår seg saman mot den rettferdige og dømmer den skuldlause.

²² Men HERREN vart mitt vern, min Gud vart fjellet der eg søkjer tilflukt.

²³ Han lét uretten deira ramma dei sjølve og gjorde ende på dei i deira vondskap. HERREN vår Gud gjorde ende på dei.