Read nynorsk 2011 Salmane 98 Bible Online

Salmane 98 - nynorsk 2011 bible

Salmane 98

¹Ein salme. Syng ein ny song for HERREN, for han har gjort under! Hans høgre hand og heilage arm har gjeve han siger.

² HERREN har gjort si frelse kjend, openberra si rettferd for auga på folka.

³ Han kjem i hug si miskunn, sin truskap mot Israels hus. Heile jorda har sett frelsa frå vår Gud.

⁴ Rop av glede for HERREN, all jorda! Bryt ut i jubel, syng og spel!

⁵ Syng for HERREN og spel på lyre, spel på lyre, lat songen tona,

⁶spel på trompetar, lat hornet klinga, rop av glede for kongens andlet, for HERREN!

⁷ Havet og alt som fyller det, skal brusa, jorda og dei som bur der.

⁸Elvane skal klappa i hender og fjella jubla i kor

⁹ for HERRENS andlet. For han kjem og skaper rett på jorda. Han skal dømma verda med rettferd og folka med rett.