Read nynorsk 2011 Salmane 99 Bible Online

Salmane 99 - nynorsk 2011 bible

Salmane 99

¹ HERREN er konge, folka skjelv, han tronar over kjerubane, jorda bivrar.

² Stor er HERREN på Sion, han er opphøgd over alle folk.

³ Dei skal prisa ditt namn, det er stort og vekkjer frykt. Heilag er han.

⁴ Mektig er kongen, han elskar det rette. Det er du som grunnfester rettvise, du gjer rett og rettferd i Jakob.

⁵ Opphøg HERREN vår Gud, bøy dykk ned for hans fotskammel! Heilag er han.

⁶ Moses og Aron var blant hans prestar, Samuel blant dei som kalla på hans namn. Dei ropa til HERREN, og han svara dei,

⁷ i skysøyla tala han til dei. Dei heldt hans bod og lova han gav.

⁸ HERRE, vår Gud, du svara dei. Du var ein Gud som tilgav dei, men som òg hemna deira gjerningar.

⁹Opphøg HERREN vår Gud, bøy dykk mot hans heilage fjell. Heilag er HERREN vår Gud.