Read nynorsk 2011 Ordtaka 10 Bible Online

Ordtaka 10 - nynorsk 2011 bible

Ordtaka 10

¹Ordtak frå Salomo. Ein klok son er til glede for far sin, men ein tåpeleg son er mor si til sorg.

² Skattar vunne med urett er til inga nytte, men rettferd bergar frå døden.

³ HERREN lèt ikkje den rettferdige svelta, men seier nei når dei urettferdige krev.

⁴ Lat hand gjer fattig, men flittige hender gjer rik.

⁵ Den forstandige samlar medan det er sommar, skam får den som søv når det er tid for å hausta.

⁶Over hovudet på den rettferdige kjem velsigning, men munnen til urettferdige løyner vald.

⁷ Minnet om den rettferdige blir til velsigning, men ryktet til urettferdige rotnar bort.

⁸Den som er vis i hjartet, tek boda til seg, men den som har dumskap på leppene, går til grunne.

⁹ Trygt går den som er heil i si ferd, men den som går krokvegar, blir avslørt.

¹⁰ Den som sender hånlege blikk, valdar smerte, men den som har dumskap på leppene, går til grunne.

¹¹ Den rettferdiges munn er ei kjelde til liv, men munnen til urettferdige løyner vald.

¹² Hat vekkjer strid, men kjærleik løyner alle synder.

¹³ På leppene til den kloke er visdom å finna, men stokken skal råka ryggen til den vitlause.

¹⁴ Dei vise samlar på kunnskap; når den dumme talar, er ulukka nær.

¹⁵ Rikmanns gods er hans faste borg, fattigdom er til ulukke for småkårsfolk.

¹⁶Løna til den rettferdige gjev liv, det den urettferdige tener, fører til synd.

¹⁷ Å akta på formaninga er ein veg til liv, å forakta tilrettevising fører vill.

¹⁸Den som løyner hat, har lygande lepper, ein dåre er den som fer med slarv.

¹⁹ Der det er mange ord, er det ingen mangel på synd, forstandig er den som tøymer tunga.

²⁰Den rettferdiges tunge er som utsøkt sølv, hjartet til dei urettferdige er lite verdt.

²¹ Den rettferdiges lepper rettleier mange, dumme døyr, for dei har ikkje vit.

²² Det er HERRENS velsigning som gjer rik, eige strev legg ingenting til.

²³ Skamlaus gjerning er til lyst for dåren, visdom er til lyst for den vituge.

²⁴ Det den urettferdige er redd for, kjem over han, men dei rettferdige får det dei lengtar etter.

²⁵ Når stormen fer forbi, blir den urettferdige borte, men den rettferdige har ein grunnvoll som varer.

²⁶Som eddik for tennene og røyk for auga er den late for den som set han i arbeid.

²⁷ Å frykta HERREN forlengjer livet, men dei urettferdige får færre år.

²⁸ Dei rettferdige har glede i vente, men det dei urettferdige har som håp, blir borte.

²⁹ HERRENS veg er eit vern for den som er heil i si ferd, men til ulukke for dei som gjer urett.

³⁰ Den rettferdige skal aldri vakla, men urettferdige får ikkje bu i landet.

³¹ Den rettferdiges munn ber visdom som frukt, men svikefull tunge skal skjerast av.

³² Den rettferdiges lepper veit kva som kan gleda, munnen til urettferdige skjønar seg på svik.