Read nynorsk 2011 Ordtaka 11 Bible Online

Ordtaka 11 - nynorsk 2011 bible

Ordtaka 11

¹ HERREN avskyr falsk vekt, men han gler seg over fullvektig lodd.

² Kjem hovmod, kjem skam, med dei audmjuke følgjer visdom.

³Rettsinn leier dei ærlege, uærlegdom gjer ende på svikarane.

⁴ Rikdom er til inga nytte på vreidedagen, men rettferd bergar frå døden.

⁵Rettferd jamnar vegen for den som er heil, den urettferdige fell for sin eigen urett.

⁶Rettferd bergar dei rettskafne, svikarar blir fanga av si eiga lyst.

⁷ Når den urettferdige døyr, er håpet ute, hans kraft gjev ikkje lenger von.

⁸ Den rettferdige blir berga or naud, den urettferdige blir råka i staden.

⁹Den gudlause bryt ned sin neste med tunga, dei rettferdige bergar seg ved sin forstand.

¹⁰ Går det godt for dei rettferdige, jublar byen, går dei urettferdige til grunne, lyder glederop.

¹¹Ved velsigning frå rettskafne blir byen bygd, tunga til urettferdige legg han i røys.

¹² Den vitlause viser forakt for sin neste, den forstandige teier stilt.

¹³ Den som baktalar, spreier løyndomar, ein påliteleg held saka skjult.

¹⁴ Utan leiarar vil folket falla. Redninga ligg i å ha mange rådgjevarar.

¹⁵ Ille går det den som kausjonerer for ein framand, den som nektar å gje handslag, er trygg.

¹⁶ Ei elskeleg kvinne vinn ære, dei flittige vinn rikdom.

¹⁷Den som er godhjarta, har gagn av det, den hjartelause skader seg sjølv.

¹⁸ Den urettferdige vinn seg ei sviktande løn, men den som sår rettferd, ei løn som varer.

¹⁹Rettferd fører til liv, den som jagar etter vondskap, må døy.

²⁰ HERREN avskyr eit falskt hjarte, han gler seg over dei som er heile i si ferd.

²¹ Når tida er inne, blir den vonde straffa, men ætta til dei rettferdige går fri.

²²Ei vakker kvinne utan vit er som ein gullring i eit grisetryne.

²³ Dei rettferdige lengtar berre etter det gode, dei urettferdige har vreide i vente.

²⁴Éin strør ut og får likevel meir, ein annan er gjerrig og endar i fattigdom.

²⁵ Den gåvmilde får gode dagar, den som auser ut til andre, får rikeleg tilbake.

²⁶Den som held på kornet sitt, blir forbanna av folket; velsigning får den som vil selja.

²⁷ Den som legg vinn på det gode, søkjer det som er til glede. Den som strevar etter det vonde, får det over seg sjølv.

²⁸ Den som lit på sin rikdom, fell, dei rettferdige veks fram som lauvet.

²⁹Den som ikkje steller sitt hus, haustar vind, den dumme blir slave for den som er vis.

³⁰ [22] Den rettferdiges frukt er eit livsens tre, men valdsferd tek liv.

³¹ [23] Når den rettferdige får si løn på jorda, kor mykje meir då ein urettferdig og ein syndar!