Read nynorsk 2011 Ordtaka 12 Bible Online

Ordtaka 12 - nynorsk 2011 bible

Ordtaka 12

¹ Den som elskar formaning, elskar kunnskap, dum er den som hatar tilrettevising.

²Den som er god, vinn velvilje hos HERREN, den som legg vonde planar, blir dømd skuldig.

³ Med urett kan ingen stå støtt, rota til dei rettferdige kan ingen rikka.

⁴ Dugande kvinne er ei krone for mannen, duglaus kone er som verk i knoklane.

⁵Dei rettferdige tenkjer på det som er rett, dei urettferdige legg svikefulle planar.

⁶ Dei urettferdige talar og ligg på lur etter blod, tunga bergar dei rettskafne.

⁷ Dei urettferdige blir kasta i koll og kjem bort, husa til dei rettferdige står.

⁸Ein mann får ros etter sitt vit, den som tenkjer vrangt, blir forakta.

⁹ Betre å vera lite vørd og ha ein tenar enn å spela storkar og mangla mat.

¹⁰ Den rettferdige har omsorg for buskapen sin, dei urettferdige er utan hjartelag.

¹¹ Den som dyrkar si jord, kan eta seg mett, vitlaus er den som jagar etter fåfengde ting.

¹²Den urettferdige vil setja vonde snarer, rota til dei rettferdige skal stå fast.

¹³Svikefulle lepper blir ei felle for den vonde, den rettferdige slepp ut or nauda.

¹⁴ Kvar og ein nyt godt av det munnen ber fram, eit menneske får att for det som det har gjort.

¹⁵ Den dumme held sin veg for å vera den rette, vis er den som høyrer på råd.

¹⁶ Den dumme viser det straks når han er sint, klok er den som teier når han blir krenkt.

¹⁷ Den som vitnar sant, talar rett, falske vitne fer med svik.

¹⁸ Tankelaus tale stikk som sverd, men vismenn har lækjedom på tunga.

¹⁹Lepper som talar sant, står seg for alltid, ei tunge som lyg, berre ei lita stund.

²⁰Dei som tenkjer ut vondt, har svik i hjartet, glede får dei som rår til fred.

²¹ Ikkje noko vondt skal ramma den rettferdige, dei urettferdige får ulukke i fullt mål.

²² HERREN avskyr lygande lepper, men gler seg over dei som viser truskap.

²³Den kløktige skjuler sin kunnskap, dårane ropar dumskapen ut.

²⁴ Flittig hand får herska, latskap leier til slavekår.

²⁵ Uro i hjartet tyngjer mannen, eit godt ord gjer han glad.

²⁶ [24] Den rettferdige slepp unna det vonde, men vegen dei urettferdige går, fører vill.

²⁷ Den late får ikkje steikt sin mat, den flittige får rike skattar.

²⁸ På rettferds stig er livet å finna, den vegen fører ikkje til døden.