Read nynorsk 2011 Ordtaka 13 Bible Online

Ordtaka 13 - nynorsk 2011 bible

Ordtaka 13

¹ Ein son blir vis av fars formaning, spottaren høyrer ikkje på åtvaring.

² Av munnens frukt kan ein nyta godt, men svikarar hungrar etter vald.

³ Den som aktar sine lepper, tek vare på livet, den som er stor i munnen, skader seg sjølv.

⁴ Den late får ikkje det han trår etter, men flittige får i overflod.

⁵Den rettferdige hatar usann tale, den urettferdige handlar skammeleg og frekt.

⁶ Rettferd vernar den som er heil i si ferd, men urett fører ein syndar til fall.

⁷ Éin spelar rik, men har ingen ting, ein annan ter seg fattig, men eig mykje.

⁸Somme kan kjøpa seg fri med rikdom, men den fattige blir ikkje utsett for trugsmål.

⁹ Lyset til dei rettferdige skin klårt, men lampa til dei urettferdige sloknar.

¹⁰ Hovmod fører berre til trette, vise er dei som tek imot råd.

¹¹ Lettvunnen rikdom minkar snart, den som samlar jamt og trutt, får mykje.

¹² [25] Langvarig venting gjer hjartet sjukt, eit oppfylt ønske er eit livsens tre.

¹³Den som foraktar ordet, går det ille, den som har age for bodet, får løn.

¹⁴ Den vises lære er ei kjelde til liv slik at ein vender seg bort frå dødens snarer.

¹⁵Godt vit vinn velvilje, svikarars ferd er alltid den same.

¹⁶ Den kløktige fer fram med vit, dåren lèt alle sjå at han er dum.

¹⁷Ein upåliteleg bodberar fell i ulukke, eit trufast sendebod kjem med lækjedom.

¹⁸ Fattigdom og skam får den som ikkje tek imot formaning. Den som lèt seg visa til rette, får ære.

¹⁹Eit oppfylt ønske gjer sjela godt, dårar avskyr å venda seg bort frå det vonde.

²⁰Den som ferdast med dei vise, blir vis, men den som held lag med dårar, går det ille.

²¹Ulukke forfølgjer syndarar, dei rettferdige får det gode til løn.

²² Den gode lèt etter seg arv til barneborn, det syndaren eig, blir spart til den rettferdige.

²³Fattigfolks nybrot gjev rikeleg føde, men alt går tapt når uretten rår.

²⁴ Den som sparer på riset, hatar son sin, den som elskar, formanar han seint og tidleg.

²⁵ Den rettferdige får eta seg mett, men urettferdige må gå med magen tom.