Read nynorsk 2011 Ordtaka 15 Bible Online

Ordtaka 15 - nynorsk 2011 bible

Ordtaka 15

¹ Eit mildt svar døyver sinne, sårande ord vekkjer harme.

² Vises tunge gjev god kunnskap, men dårskap strøymer frå dårars munn.

³ HERRENS auge er alle stader, dei vaker over vonde og gode.

⁴ Ei lækjande tunge er eit livsens tre, ei falsk tunge knuser livsmotet.

⁵ Den dumme foraktar formaning frå far sin, klok er den som lèt seg visa til rette.

⁶Den rettferdiges hus rommar stor rikdom; det den urettferdige vinn, fører til ulukke.

⁷Vises lepper strør ut kunnskap, det gjer ikkje dårens hjarte.

⁸ HERREN avskyr offer frå urettferdige, bøn frå dei rettskafne har han glede i.

⁹ HERREN avskyr vegen til den urettferdige, men elskar den som jagar etter rettferd.

¹⁰ Streng straff får den som går bort frå stigen, den som hatar tilrettevising, skal døy.

¹¹ Dødsrike og avgrunn ligg opne for HERREN, kor mykje meir då menneskehjartet.

¹² Spottaren mislikar å bli vist til rette, han går ikkje til dei vise.

¹³ Glede i hjartet gjer andletet venleg, sorg i hjartet gjer motlaus.

¹⁴ Eit klokt hjarte søkjer kunnskap, men dårens munn lever av dårskap.

¹⁵For ein fattig er alle dagar vonde, den fornøgde gjer kvar dag til ein fest.

¹⁶ Betre å ha lite og frykta HERREN enn å ha stor rikdom med uro attåt.

¹⁷ Betre er ein grønsakrett med kjærleik enn oksesteik med hat attåt.

¹⁸ Den som er sint, valdar trette, den som er sein til vreide, får striden til å stilna.

¹⁹ For den late er vegen som klungerkratt, for dei rettskafne er stigen ein rydda veg.

²⁰ Ein klok son er til glede for far sin, ein tåpeleg mann foraktar mor si.

²¹ Den vitlause har glede av dårskap, den forstandige held rett kurs.

²² Utan rådlegging mislukkast planane, når mange gjev råd, skal dei lukkast.

²³ Glad blir den som kan gje svar. Kor godt med eit ord i rette tid!

²⁴For den forstandige fører livsvegen oppover, slik slepp han unna dødsriket der nede.

²⁵ HERREN riv huset ned for dei hovmodige, men for enkjer lèt han grensesteinen stå.

²⁶ HERREN avskyr tankane til den vonde, men venlege ord er reine.

²⁷ Den som jaktar på vinning, set huset over styr, den som nektar å la seg kjøpa, skal leva.

²⁸Den rettferdige tenkjer før han talar, men vondskap strøymer frå munnen på urettferdige.

²⁹ HERREN er langt borte frå dei urettferdige, men han høyrer bøna frå dei rettferdige.

³⁰Strålande auge gleder hjartet, god bodskap gjev merg i bein.

³¹ Den som høyrer på rettleiing om livet, får plass blant dei vise.

³² Den som ikkje tek imot formaning, foraktar seg sjølv, den som lèt seg visa til rette, kjøper seg innsikt.

³³ Frykt for HERREN oppdreg til visdom, å vera audmjuk er vegen til ære.