Read nynorsk 2011 Ordtaka 16 Bible Online

Ordtaka 16 - nynorsk 2011 bible

Ordtaka 16

¹ Menneskehjartet legg sine planar, men svaret på tunga kjem frå HERREN.

² Ein mann kan synast at hans ferd er rein, men HERREN prøver tankane.

³ Legg alt du gjer, i HERRENS hand, så skal planane dine lukkast.

⁴ HERREN skapte alt for eit føremål, jamvel den urettferdige for ulukkedagen.

⁵ HERREN avskyr den som har eit hovmodig hjarte, når tida er inne, blir han straffa.

⁶ Med miskunn og truskap blir skuld sona, den som fryktar HERREN, vender seg bort frå det vonde.

⁷Den som går vegar som gleder HERREN, får fred jamvel med fiendane sine.

⁸ Betre å ha lite med rettferd enn å få stor vinning med urett.

⁹ I hjartet tenkjer mannen ut sin veg, men det er HERREN som styrer stega hans.

¹⁰ På kongens lepper er rette svar, han sviktar ikkje når han dømmer.

¹¹ Rett vekt og vektskål er HERRENS sak, kvart vektlodd i pungen er hans verk.

¹² Kongar avskyr lovlaus gjerning, for ved rettferd skal trona tryggjast.

¹³Ærlege lepper er til glede for kongen, han elskar den som talar rett.

¹⁴ Kongens harme ber bod om død, men ein vis kan stilla harmen.

¹⁵ Når kongens andlet lyser, er livet berga. Hans velvilje er som ei sky med vårregn.

¹⁶ Å kjøpa visdom er betre enn gull, å kjøpa innsikt er meir verdt enn sølv.

¹⁷Vegen for dei rettskafne er å venda seg bort frå det vonde, den som aktar på si ferd, tek vare på livet.

¹⁸ Stormod kjem føre samanbrot, hovmod føre fall.

¹⁹Betre å vera audmjuk med dei fattige enn å dela bytte med dei stolte.

²⁰ Den som handlar forstandig, skal finna det gode, sæl er den som lit på HERREN.

²¹Klok kallar dei den som har visdom i hjartet, veltalande tunge gjev større lærdom.

²² Den som har vit, har ei kjelde til liv, det er dumt å formana den dumme.

²³Hjartet til den vise gjer munnen hans klok, legg meir og meir lærdom på leppene hans.

²⁴ Venlege ord er drypande honning, søte for sjela og sunne for kroppen.

²⁵ Ein veg som synest vera den rette, kan likevel enda i døden.

²⁶Svolten får arbeidaren til å slita, hungeren driv han fram.

²⁷ Eit vondsinna menneske grev opp vondskap, på leppene hans brenn det som eld.

²⁸ Ein som er svikefull, valdar trette, den som baktalar andre, skil ven frå ven.

²⁹Valdsmannen lokkar sin neste og fører han inn på ein veg som ikkje er god.

³⁰ Han knip att auga, pønskar på svik; han pressar leppene saman og set det vonde i verk.

³¹ Grått hår er ei fager krone, på rettferds veg er ho å finna.

³² Betre å vera sein til vreide enn å vera krigshelt, betre å styra sitt sinn enn å ta ein by.

³³Dei rister terningen i fanget, korleis han fell, avgjer HERREN.