Read nynorsk 2011 Ordtaka 17 Bible Online

Ordtaka 17 - nynorsk 2011 bible

Ordtaka 17

¹ Betre er ein tørr brødbit i ro og fred enn huset fullt av festmat og krangel.

²Ein forstandig slave blir herre over ein duglaus son og får del i arven med brørne hans.

³ Sølv prøver ein i digelen og gull i smelteomnen, men HERREN prøver hjarta.

⁴Den som gjer vondt, lyttar til vonde tunger, løgnaren høyrer på skadeleg snakk.

⁵ Den som spottar den fattige, håner hans skapar, den som gleder seg over ulukke, slepp ikkje straff.

⁶ Barneborn er ei krone for dei gamle, og borna er stolte av fedrane sine.

⁷Å bruka store ord sømer seg ikkje for ein dåre, løgn endå mindre for ein stormann.

⁸ Den som gjev stikkpengar, trur han har ein lukkestein, kvar han vender seg, går det han godt.

⁹ Den som dekkjer over eit feilsteg, legg vinn på venskap, den som ber det vidare, skil ven frå ven.

¹⁰Åtvaring bit betre på den kloke enn hundre slag på dåren.

¹¹Den som er vond, søkjer berre opprør, men eit nådelaust sendebod kjem imot han.

¹²Det er betre å møta ei binne som har mista ungane sine, enn å møta ein dåre i hans dårskap.

¹³Løner nokon godt med vondt, vik ulukka aldri frå huset hans.

¹⁴Den som byrjar ein krangel, opnar for ein flaum. Hald opp før tretta bryt laus!

¹⁵ Å frikjenna ein skuldig og å dømma ein som har rett — HERREN avskyr begge delar.

¹⁶Kva hjelper pengar i handa på dåren? Kan han kjøpa visdom når han ikkje har vit?

¹⁷Ein ven viser alltid kjærleik, ein bror er fødd til å hjelpa i naud.

¹⁸ Vitlaus er den som gjev handslag og kausjonerer for nesten sin.

¹⁹ Den som likar trette, likar synd; den som gjer døra høg, søkjer samanbrot.

²⁰Eit falskt hjarte finn ikkje det gode, ei svikefull tunge fører i ulukke.

²¹ Sorg får den som har ein dåre til son, far til ein narr har inga glede.

²² Glede i hjartet gjev god helse, mismot tærer på kroppen.

²³ Den urettferdige tek imot gåver frå lomma for å vrengja rettens veg.

²⁴Den kloke har visdom for auge, dårars blikk flakkar til enden av jorda.

²⁵ Ein uvitug son gjer far sin sint, er til beisk sorg for henne som fødde han.

²⁶Det er gale å gje ein rettferdig bøter, verre å slå stormenn fordi dei er rettskafne.

²⁷ Klok er den som sparer på orda, den forstandige held hovudet kaldt.

²⁸ Sjølv den dumme blir rekna for vis når han teier, og klok så lenge han held munn.