Read nynorsk 2011 Ordtaka 18 Bible Online

Ordtaka 18 - nynorsk 2011 bible

Ordtaka 18

¹Ein einstøing følgjer si eiga lyst, glefser mot alle kloke råd.

² Dåren bryr seg ikkje om innsikt, han vil berre visa kva han tenkjer sjølv.

³Kjem ein urettferdig, kjem forakt, og med skam følgjer spott.

⁴ Ein manns ord er som djupt vatn, og visdomens kjelde er ein bekk som vell fram.

⁵ Det er gale å halda med ein urettferdig og driva den rettferdige bort frå retten.

⁶Dårens lepper valdar strid, munnen hans ropar etter riset.

⁷ Dårens munn blir hans undergang, leppene blir ei snare for han.

⁸ Ord frå ein baktalar er som lekre retter, dei glid ned i magen.

⁹Den som forsømer arbeidet sitt, er bror til den som øydelegg.

¹⁰ HERRENS namn er eit festningstårn, dit spring den rettferdige og finn vern.

¹¹ Rikmanns gods er hans faste borg, i hans tanke er det som ein vernande mur.

¹² Før mannen fell, er han stolt i hjartet, føre ære går audmjukt sinn.

¹³Den som svarar før han høyrer, er dum og haustar skam.

¹⁴ Motet held eit menneske oppe i sjukdom, men mismot, kven kan bera det?

¹⁵Eit klokt hjarte kjøper seg kunnskap, vismenns øyre søkjer kunnskap.

¹⁶ Gåver opnar dører og gjev tilgang til dei store.

¹⁷Den som talar først i ei sak, får rett, til motparten kjem og spør han ut.

¹⁸Loddkasting gjer ende på tretter og avgjer strid mellom mektige.

¹⁹Ein krenkt bror er ein festningsby; krangel er som bommen på ein borgport.

²⁰ Magen nyt godt av det munnen ber fram, leppene ber frukt som mettar.

²¹ Tunga har makt over død og liv, dei som gjerne bruker henne, får smaka frukta.

²² Den som finn ei kone, finn lukka; han har vunne velvilje hos HERREN.

²³Den fattige kjem med bøn om nåde, den rike svarar med harde ord.

²⁴ Det finst vener som skader kvarandre, men ein sann ven er meir trufast enn ein bror.