Read nynorsk 2011 Ordtaka 19 Bible Online

Ordtaka 19 - nynorsk 2011 bible

Ordtaka 19

¹ Betre å vera fattig og heil i si ferd enn å vera ein dåre med falske lepper.

²Iver utan kunnskap er av det vonde, den som har hastverk, trør feil.

³Eigen dårskap fører mennesket til fall, men hjartet rasar mot HERREN.

⁴ Rikdom skaffar mange vener, den fattige mistar den venen han har.

⁵ Falske vitne slepp ikkje straff, dei som fer med løgn, går ikkje fri.

⁶ Mange smiskar for storfolk, alle er vener med den som gjev gåver.

⁷ Den fattige er forakta av alle sine slektningar, jamvel venene hans held seg unna. Han vil vinna dei med ord, men dei kjem ikkje.

⁸Den som vinn seg innsikt, har livet kjært, den som tek vare på forstand, finn det gode.

⁹ Falske vitne slepp ikkje straff, dei som fer med løgn, går til grunne.

¹⁰ Det høver ikkje for dåren å leva i overflod, endå mindre for slaven å rå over fyrstar.

¹¹ Forstand gjer mennesket sein til vreide, det set si ære i å bera over med feilsteg.

¹² Kongens sinne er som løvebrøl, hans velvilje er som dogg over graset.

¹³ Ein uvitug son er ei ulukke for far sin, kvinnetrette er som stadig takdrop.

¹⁴ Hus og eigedom er arv frå fedrane, ei forstandig kone er ei gåve frå HERREN.

¹⁵ Latskap dyssar i søvn, den som er makeleg, må svelta.

¹⁶ Den som tek vare på bodet, tek vare på livet, den som ikkje bryr seg om kor han går, må døy.

¹⁷ Den som hjelper den fattige, låner til HERREN, som vil løna han for det han har gjort.

¹⁸ Ver streng mot son din, for det er enno håp, men bli ikkje så ivrig at du tek livet av han.

¹⁹Den som lèt harmen ta makta, må bera straffa; vil du berga han, må du gjera det igjen og igjen.

²⁰ Høyr på råd og ta imot formaning, så blir du vis til slutt.

²¹ Det er mange tankar i menneskehjartet, men det er HERRENS vilje som skjer.

²² Truskap er det ein ønskjer av eit menneske; betre å vera fattig enn ein løgnar.

²³ Å frykta HERREN gjev liv. Mett kan ein gå til nattekvile og vera trygg for det vonde.

²⁴ Den late stikk handa i fatet, men får henne ikkje opp til munnen eingong.

²⁵ Slå spottaren, så blir den vitlause klok, vis den vituge til rette, så får han større forstand.

²⁶ Den som plyndrar far sin, kastar ut mor si. Slik ein son gjev spott og skam.

²⁷Hald opp med å høyra på formaning, son min, om du vil vika frå kunnskapens ord.

²⁸ Eit vondsinna vitne spottar retten, munnen til lovlause sluker vondskap.

²⁹ Straff er fastsett for dei som spottar, og pryl for ryggen på dårar.