Read nynorsk 2011 Ordtaka 2 Bible Online

Ordtaka 2 - nynorsk 2011 bible

Ordtaka 2

¹Son min, om du tek imot orda mine og gøymer boda mine hos deg

²så ditt øyre lyttar til visdom og du opnar hjartet for forstand,

³ja, om du kallar på innsikt og ropar høgt etter forstand,

⁴ om du søkjer etter han som var det sølv, leitar som etter ein skatt,

⁵ då skal du læra å frykta HERREN, finna ut kva det er å kjenna Gud.

⁶ For det er HERREN som gjev visdom, frå hans munn kjem kunnskap og forstand.

⁷ Han samlar opp klokskap til dei rettskafne, er eit skjold for den som er heil i si ferd.

⁸Han vernar rettens stigar og vaktar vegen hans trugne går.

⁹Då skal du skjøna ærlegdom, rettferd og rett, alle gode vegar.

¹⁰Visdom skal koma inn i hjartet ditt, kunnskap skal gjera deg glad,

¹¹omtanke skal vakta deg, forstand verna deg

¹²og berga deg frå vegen åt dei vonde, dei som vrengjer og vrid på alt dei seier,

¹³frå dei som forlèt dei rette stigane og går på mørke vegar.

¹⁴Dei gleder seg når dei gjer noko vondt, jublar over det som er vondt og vrangt.

¹⁵Krokete er stigane deira, dei går på ville vegar.

¹⁶ Visdomen skal fria deg frå ei anna kvinne, ei framand kvinne med glatte ord,

¹⁷ [4] ho som har svike sin ungdoms ven og gløymt pakta med sin Gud.

¹⁸ Huset hennar søkk ned i døden, til daudingar ber hennar vegar.

¹⁹Dei som går inn til henne, vender aldri attende, dei når ikkje fram til livsens stigar.

²⁰Difor skal du gå der dei gode ferdast, og halda deg på stigar dei rettferdige går.

²¹ For dei rettskafne skal bu i landet, den som er heil, skal få vera der.

²² Men dei urettferdige skal ryddast ut frå landet og svikarane rivast bort.