Read nynorsk 2011 Ordtaka 20 Bible Online

Ordtaka 20 - nynorsk 2011 bible

Ordtaka 20

¹ Vinen er ein spottar, sterk drikk er ein skrålhals, vitlaus er den som ravar i rus.

² Når kongen trugar, er det som løvebrøl, den som gjer han sint, set livet på spel.

³ Å halda seg frå trette er ei ære for mannen, den som er dum, yppar til strid.

⁴ Den late vil ikkje pløya om hausten, han ventar avling, men får inga.

⁵ Som djupt vatn er tankane i menneskehjartet, den som har vit, kan ausa av dei.

⁶Mange ropar om sin eigen truskap, men kvar finst den ein kan lita på?

⁷ Den rettferdige er heil i si ferd, heldige er borna etter han.

⁸ Ein konge som sit i dommarsetet, skil ut alt vondt med sitt blikk.

⁹ Kven kan seia: «Eg har halde hjartet reint, eg er reinsa for synd»?

¹⁰ To slag vekt og to slag mål, HERREN avskyr dei begge.

¹¹ Jamvel ein ung gut viser i handling om det han gjer, er reint og rett.

¹² Øyret som høyrer, og auget som ser, HERREN har skapt dei begge.

¹³ Elsk ikkje søvnen, for då blir du fattig, lat opp auga og et deg mett.

¹⁴«Berre skrap», seier kjøparen, men når han går bort, er han fornøgd med seg sjølv.

¹⁵Det finst gull og perler i mengd, men klok tale er eit sjeldsynt smykke.

¹⁶ Ta kleda frå den som har kausjonert for ein framand, ta dei i pant for dei ukjende!

¹⁷ Brød frå løgn smakar godt, men sidan fyllest munnen med grus.

¹⁸ Om ein held råd, lukkast planane. Legg planar før du fører krig!

¹⁹ Den som baktalar, røper det hemmelege, hald ikkje lag med den som er lausmunna!

²⁰ Den som forbannar far sin og mor si, hans lampe skal slokna når mørkret kjem.

²¹Ein arv som ein riv til seg for tidleg, gjev inga velsigning til slutt.

²² Sei ikkje: «Eg vil gjengjelda det vonde.» Vent på HERREN, så hjelper han deg!

²³ HERREN avskyr to slag lodd, falsk vekt er ikkje av det gode.

²⁴ Det er HERREN som styrer mannens steg. Korleis kan mennesket skjøna sin veg?

²⁵ Det er ei snare for mennesket å gje heilage lovnader før ein har tenkt seg om.

²⁶ [28] Den vise kongen skil ut dei urettferdige og lèt hjulet rulla over dei.

²⁷ Ånda hos mennesket er ei HERRENS lampe, ho ransakar alle rom i hans indre.

²⁸ Miskunn og truskap er eit vern om kongen, han stør si trone på miskunn.

²⁹ Styrke er ein prydnad for dei unge og grått hår ei ære for dei gamle.

³⁰Sviande sår reinsar bort det vonde, slag reinsar dei inste rom.