Read nynorsk 2011 Ordtaka 22 Bible Online

Ordtaka 22 - nynorsk 2011 bible

Ordtaka 22

¹ Godt namn er meir verdt enn stor rikdom, respekt er betre enn sølv og gull.

² Rik og fattig møtest, HERREN har skapt dei begge.

³ Den kløktige ser ulukka koma og gøymer seg, dei vitlause går på og får si straff.

⁴ Å vera audmjuk og frykta HERREN gjev rikdom, ære og liv.

⁵På vegen dei svikefulle går, er tornar og snarer, den som vil ta vare på livet, held seg borte frå dei.

⁶ Lær den unge vegen han skal gå, så vik han ikkje av når han blir gammal.

⁷ Den rike er herre over dei fattige, den som låner, blir slave under långjevaren.

⁸ Den som sår urett, haustar vondskap, riset han bruker i sinne, blir øydelagt.

⁹ Den som har auge for å gjera godt, blir velsigna, for han deler sitt brød med den fattige.

¹⁰ Jag spottaren ut, så går krangelen med, strid og skam får ein ende.

¹¹ Den som elskar eit reint hjarte og har milde ord på leppene, får kongen til ven.

¹² HERRENS auge vaker over kunnskapen, men svikarens ord gjer han til inkjes.

¹³ Den late seier: «Det er ei løve der ute, eg kunne bli drepen midt på torget!»

¹⁴ Munnen til framand kvinne er ei djup grav, den HERREN er harm på, fell nedi.

¹⁵ Dumskap høyrer ungdomen til, riset kan oppdra og driva dumskapen bort.

¹⁶ [29] Den som undertrykkjer fattige for sjølv å bli rik, og den som gjev gåver til rike, lid berre tap.

¹⁷ [30] Legg øyret til og høyr orda frå dei vise, legg deg på hjartet den kunnskapen eg gjev.

¹⁸Det er godt å ta vare på dei i sitt indre og alltid ha dei på leppene.

¹⁹For deg kunngjer eg dei i dag, så du kan setja di lit til HERREN.

²⁰Ja, eg har skrive opp tretti ordtak for deg med kloke råd

²¹for å læra deg sanne og pålitelege ord, så du kan gje pålitelege svar til dei som har sendt deg.

²² Ran ikkje den fattige fordi han er fattig, knus ikkje den hjelpelause i retten!

²³ For HERREN vil føra saka for dei og røva livet frå røvarane.

²⁴Ver ikkje ven med den hissige, slå ikkje lag med den bråsinte,

²⁵så du ikkje lærer deg hans vegar og set ei snare for ditt liv.

²⁶ Ver ikkje blant dei som gjev sitt handslag og stiller kausjon for gjeld.

²⁷Om du ikkje har noko å betala med, tek dei endåtil senga du ligg på.

²⁸ Flytt ikkje gamle grensesteinar som fedrane dine har reist.

²⁹Ser du ein mann som er dugande i sitt arbeid? Han kan ta teneste hos kongar og skal ikkje tena hos småkårsfolk.