Read nynorsk 2011 Ordtaka 23 Bible Online

Ordtaka 23 - nynorsk 2011 bible

Ordtaka 23

¹Når du sit til bords med ein herskar, tenk vel over kven du har framfor deg,

²og set ein kniv på strupen om matlysta blir for stor.

³Ha ikkje lyst på dei lekre rettene hans, for det er svikefull kost.

⁴Slit deg ikkje ut for å bli rik! Hald opp med det, forstandig som du er.

⁵Når du ser etter rikdomen, er han borte; brått får han venger og flyg mot himmelen som ei ørn.

⁶Et ikkje mat hos ein som er gjerrig, ha ikkje lyst på dei lekre rettene hans!

⁷For han er slik han tenkjer inst inne. Han seier nok til deg: «Et og drikk», men hjartet hans er ikkje med deg.

⁸Den biten du har ete, må du kasta opp att, dine venlege ord er bortkasta.

⁹ Snakk ikkje til ein dåre, han foraktar dine kloke ord.

¹⁰ Flytt ikkje gamle grensesteinar, gå ikkje inn på farlauses grunn!

¹¹ [31] For dei har ein sterk løysingsmann, og han skal føra saka dei har mot deg.

¹²Opna hjartet ditt for formaning og øyret for forstandige ord!

¹³ Lat ikkje guten vera utan formaning! Gjev du han ris, skal han ikkje døy.

¹⁴Når du slår han med riset, bergar du han frå dødsriket.

¹⁵ Son min, har du visdom i hjartet, blir det òg glede i hjartet mitt.

¹⁶Nyrene mine jublar når leppene dine seier det som er rett.

¹⁷ Ditt hjarte skal ikkje misunna syndarar, men alltid med iver frykta HERREN!

¹⁸ Då har du ei framtid, ditt håp er ikkje ute.

¹⁹ Høyr no, son min, og bli vis, styr hjartet inn på rette vegar!

²⁰ Ver ikkje blant dei som drikk seg fulle på vin og fråtsar i kjøt.

²¹For drankaren og fråtsaren blir fattige, den søvndrukne blir kledd i filler.

²² Høyr på far din, som gav deg livet, sjå ikkje ned på di gamle mor!

²³ Kjøp deg sanning og sel henne ikkje, kjøp visdom, formaning og innsikt!

²⁴ Ein far jublar høgt over ein rettferdig son, den som får ein vis son, blir glad.

²⁵Ver til glede for far din og mor di, lat henne som fødde deg, jubla.

²⁶Son min, gjev meg ditt hjarte, lat auga sjå med glede på mine vegar!

²⁷ Ei hore er ei djup grav, ei framand kvinne er ein trong brønn.

²⁸ Ja, ho ligg på lur som ein røvar og aukar talet på trulause menn.

²⁹ Kven ropar akk, kven ropar ve, kven må krangla, og kven må klaga? Kven har utan grunn fått sår, og kven har sløve auge?

³⁰Jau, dei som sit lenge oppe over vinen, dei som kjem for å smaka på kryddervinen.

³¹Sjå ikkje på vinen, kor raud han er, kor fint han blenkjer i kruset, og kor lett han renn ned.

³²Til sist bit han som ein slange, han høgg som ein orm.

³³Då ser auga dine underlege ting, og hjartet snakkar tull og tøv.

³⁴Det er som var du midt ute på havet og sov høgt oppe i riggen.

³⁵«Dei slo meg, men det gjorde ikkje vondt. Dei banka meg, men eg kjende det ikkje. Når skal eg vakna? Eg vil ha meir å drikka!»