Read nynorsk 2011 Ordtaka 24 Bible Online

Ordtaka 24 - nynorsk 2011 bible

Ordtaka 24

¹ Misunn ikkje vonde menneske, lengt ikkje etter å vera saman med dei!

²For hjartet deira tenkjer på vald, og leppene talar om ulukke.

³ Med visdom blir huset bygd, og med innsikt blir det reist.

⁴ Med kunnskap blir romma fylte av dyre og fine skattar.

⁵ Ein mann som er vis, har styrke, den som har kunnskap, er full av kraft.

⁶ Legg planar før du fører krig, når mange gjev råd, vinn du siger.

⁷ [32] Visdomen heng for høgt for den dumme, i byporten opnar han ikkje sin munn.

⁸Den som legg vonde planar, blir kalla renkesmed.

⁹Påfunna til den dumme er synd, spottaren møter avsky blant folk.

¹⁰ Mistar du motet på den dagen du er i naud, har du òg mista din styrke.

¹¹ Berg dei som blir førte til døden, hald att dei som vaklar mot rettarstaden!

¹² Seier du: «Vi visste det ikkje», så ser han det, han som prøver hjarta. Han som vaktar livet ditt, veit det og gjev kvar og ein att etter det han har gjort.

¹³Et honning, son min, for den er god, flytande honning er søt for ganen.

¹⁴ Og vit at slik er visdomen for sjela. Finn du den, har du ei framtid, ditt håp er ikkje ute.

¹⁵ Ligg ikkje på lur som ein urettferdig der den rettferdige bur, legg ikkje heimen hans øyde!

¹⁶ Sju gonger kan den rettferdige falla og reisa seg att, men dei urettferdige snublar i det som er vondt.

¹⁷ Gled deg ikkje når fienden din fell, hjartet skal ikkje jubla når han snublar.

¹⁸Då vil HERREN sjå på det med uvilje og venda vreiden sin bort frå han.

¹⁹ [33] Ver ikkje harm på dei som gjer vondt, og misunn ikkje dei lovlause!

²⁰ For dei vonde har inga framtid, lampa til dei urettferdige sloknar.

²¹ Frykt HERREN og kongen, son min! Slå deg ikkje saman med dei som vil forandra.

²²For brått kan ulukka ramma dei. Kven veit kva slag øydelegging dei to kan senda?

²³Dette òg er ord av dei vise: Det er gale å gjera skilnad på folk i retten.

²⁴Seier nokon til ein skuldig: «Du er uskuldig», vil folk forbanna han og folkeslag fordømma han.

²⁵Men dei som dømmer rett, går det vel, lukke og velsigning kjem over dei.

²⁶Eit ærleg svar er eit kyss på leppene.

²⁷Fullfør arbeidet ute, gjer deg ferdig på åkeren, så kan du byggja deg hus.

²⁸ Ver ikkje utan grunn vitne mot nesten din, så du svik han med leppene dine.

²⁹ Sei ikkje: «Som han har gjort mot meg, slik vil eg gjera mot han; eg vil gje han att etter det han har gjort.»

³⁰Eg gjekk forbi ein lat manns åker, langs vinmarka til eit menneske utan forstand.

³¹Sjå, der var det fullt av nesler, grunnen var overgrodd med tistlar, og steingjerdet var nedrive.

³²Eg la merke til dette og la meg det på hjartet, eg tok lærdom av det eg såg.

³³ «Litt søvn, litt kvile med hendene i fanget,

³⁴så kjem fattigdomen på deg som farande fant og nauda som velvæpna mann.»