Read nynorsk 2011 Ordtaka 25 Bible Online

Ordtaka 25 - nynorsk 2011 bible

Ordtaka 25

¹[34] Dette er òg ordtak frå Salomo. Dei er overleverte frå mennene til Juda-kongen Hiskia.

² Det er Guds ære å skjula ei sak, men kongars ære å granska henne.

³Himmelhøgd og jordedjup og kongars hjarte kan ingen granska.

⁴Skil slagget frå sølvet, så kan sølvsmeden laga ei skål.

⁵ Før den urettferdige bort frå kongen, så skal trona hans tryggjast ved rettferd.

⁶Du skal ikkje framheva deg sjølv når kongen ser på, stig ikkje fram på plassen til dei store!

⁷ For det er betre at dei seier til deg: «Kom og set deg her oppe!» enn at dei flytter deg ned på grunn av ein stormann. Kva du så ser med eigne auge,

⁸ver ikkje for snar til å reisa sak. For kva vil du gjera til sist når nesten din fører skam over deg?

⁹ Før berre saka med nesten din, men røp ikkje ein annans løyndomar!

¹⁰Elles vil den som høyrer det, klandra deg; ryktet du spreier, kan ikkje kallast tilbake.

¹¹ Som eple av gull i eit smykke av sølv er ord ein talar i rette tid.

¹²Som ein ring av gull, som eit smykke av fint gull er refsingsord frå den vise til ein som vil høyra.

¹³ Som svalande snø når det er tid for å hausta, er eit trufast sendebod for den som sende han, han gjev herren sin nye krefter.

¹⁴ Lik skyer og vind som ikkje gjev regn, er den som skryter av gåver han ikkje gjev.

¹⁵ Med tolmod blir hovdingen overtala, ei mild tunge knuser bein.

¹⁶Finn du honning, så et ikkje meir enn du treng, elles blir du for mett og må kasta opp.

¹⁷Set ikkje for ofte foten i huset til venen din, elles blir han lei av deg og får avsky for deg.

¹⁸ Som ei klubbe, eit sverd, ei kvass pil er den som vitnar falskt mot nesten.

¹⁹Som ei ròten tann, ein vaklande fot er det å stola på ein svikar når nauda kjem.

²⁰Som å kasta kappa ein vinterdag, som å slå eddik på sår er det å syngja for eit sorgfullt hjarte.

²¹ Er fienden din svolten, så lat han få mat, er han tørst, så gjev han vatn å drikka.

²² [35] Då samlar du glødande kol på hovudet hans, og HERREN skal løna deg.

²³Nordavinden føder regn, baktale føder sinte andlet.

²⁴ Betre å bu i ein krok på taket enn å dela hus med trettekjær kvinne.

²⁵Kaldt vatn for den som er sliten, slik er godt nytt frå framandt land.

²⁶Ei grumsete kjelde, ein utskjemd brønn er ein rettferdig som gjev etter for ein urettferdig.

²⁷ Å eta for mykje honning er ikkje godt, heller ikkje stendig å trå etter ære!

²⁸ Lik ein øydelagd by med nedriven mur er den som ikkje kan styra sitt sinn.