Read nynorsk 2011 Ordtaka 27 Bible Online

Ordtaka 27 - nynorsk 2011 bible

Ordtaka 27

¹ Pris deg ikkje lukkeleg over morgondagen, for du veit ikkje kva han ber i sitt fang.

² Ein annan skal prisa deg lukkeleg, ikkje din eigen munn, ein framand, ikkje dine eigne lepper.

³Steinen er tung, og sand veg mykje, men ein dum som er sint, er tyngre enn begge.

⁴ Harmen er grufull, vreiden er ein flaum, men kven kan stå seg mot sjalusi?

⁵ Betre er open kritikk enn skjult sympati.

⁶ Sår frå ein ven er til å lita på, men fiendens kyss er svikefulle.

⁷Den mette vrakar den finaste honning, alt beiskt smakar søtt for den svoltne.

⁸Lik ein fugl som flyg frå reiret, er ein mann som flyg frå heimen.

⁹ Olje og røykjelse gleder hjartet, god venskap styrkjer sjela.

¹⁰ Gjev ikkje slepp på din ven og på venen til far din; gå ikkje heim til ein bror på ulukkedagen din. Betre med ein nær granne enn ein bror langt borte.

¹¹ Bli vis, son min, og gled mitt hjarte, så eg kan svara dei som håner meg.

¹² Den kløktige ser ulukka koma og gøymer seg, dei vitlause går på og får si straff.

¹³ [37] Ta kleda frå den som har kausjonert for ein framand, ta pant i dei for dei ukjende!

¹⁴Når nokon velsignar sin neste med høg røyst tidleg om morgonen, er det å rekna som ei forbanning.

¹⁵ Som stadig takdrop ein regnvêrsdag, slik er ei trettekjær kvinne.

¹⁶Å gøyma henne er som å gøyma vinden eller å gripa olje med handa.

¹⁷Jern kvesser jern, og det eine mennesket kvesser det andre.

¹⁸ Den som passar på fikentreet, får eta frukta; den som tek vare på herren sin, vinn ære.

¹⁹Som andlet speglar seg mot andlet i vatnet, finn det eine menneske sitt hjarte att hos det andre.

²⁰ Dødsrike og avgrunn blir aldri mette, og menneskeauga får aldri nok.

²¹ Sølv prøver ein i digelen og gull i smelteomnen, og mannen når han får ros.

²²Støyter du den dumme i mortaren og knuser han saman med kornet, går dumskapen likevel ikkje av han.

²³ Merk deg korleis sauene ser ut, syt vel for buskapen din!

²⁴ For rikdom varer ikkje evig. Går eit diadem frå slekt til slekt?

²⁵Når nytt gras kjem til syne etter slåtten og høyet frå fjella er samla inn,

²⁶då har du lam som gjev deg klede, og bukkar til å kjøpa jord for,

²⁷du har geitemjølk nok til å fø deg sjølv og ditt hus og livsopphald for tenestejentene.