Read nynorsk 2011 Ordtaka 29 Bible Online

Ordtaka 29 - nynorsk 2011 bible

Ordtaka 29

¹Den som ofte blir tala til rette og endå er stivnakka, blir brått knust og kan ikkje lækjast.

² Når dei rettferdige blir mange, gleder folket seg, når ein urettferdig herskar, sukkar folket.

³ Den som elskar visdom, gleder far sin, den som held lag med horer, øyder det han eig.

⁴ Ein konge byggjer opp landet med rett, ein som lèt seg kjøpa med gåver, legg det i øyde.

⁵ Den som smiskar for nesten sin, set eit garn for føtene hans.

⁶ Synda blir ei snare for den som er vond, men den rettferdige kan jubla og gleda seg.

⁷ Den rettferdige kjenner saka til dei fattige, men den urettferdige er utan innsikt.

⁸Spottarar hissar opp heile byen, dei vise får vreiden til å leggja seg.

⁹Når den vise har sak mot den dumme, blir det sinne eller latter, men inga ro.

¹⁰Dei blodtørste hatar den som er from, men dei rettskafne vil berga livet hans.

¹¹ Ein dåre slepper alle sine kjensler ut, den vise held dei att.

¹²Ein herskar som høyrer på løgn, får berre kjeltringar til tenarar.

¹³ [38] Fattig og undertrykkjar møtest, HERREN gjev begge lys i auga.

¹⁴ Når ein konge dømmer dei fattige rettferdig, står trona hans fast for alltid.

¹⁵ Ris og tilrettevising gjev visdom, men ein gut med frie taumar fører skam over mor si.

¹⁶ Blir dei urettferdige mange, aukar synda, men dei rettferdige får sjå at dei fell.

¹⁷ Oppdra son din, så gjev han deg ro og fyller deg med glede.

¹⁸Utan openberring fer folket vill, sæl er den som held lova.

¹⁹Ein slave lèt seg ikkje oppdra med ord, han forstår dei nok, men bryr seg ikkje.

²⁰ Ser du ein mann som er snar når han talar — det er større håp for dåren enn for han.

²¹Skjemmer ein slaven sin bort frå han er ung, endar det med at han blir ulydig.

²² Den snarsinte valdar trette, den hissige gjer mange feilsteg.

²³ Hovmod fører menneske til fall, men den audmjuke vinn ære.

²⁴ Helaren hatar sitt eige liv, dei tek han i eid, men han vil ikkje vitna.

²⁵ Den som er redd menneske, set ei snare for seg sjølv, men den som stolar på HERREN, har eit vern.

²⁶Mange prøver å vinna velvilje hos ein herskar, men eit menneske får sin rett frå HERREN.

²⁷Dei rettferdige avskyr den som gjer urett, dei urettferdige avskyr den som lever rett.