Read nynorsk 2011 Ordtaka 3 Bible Online

Ordtaka 3 - nynorsk 2011 bible

Ordtaka 3

¹ Son min, gløym ikkje mi rettleiing, ta vare på mine bod i hjartet!

²For dei vil gje deg mange år og eit langt liv og overflod av fred.

³ [5] Lat aldri godleik og truskap fara! Bind dei om halsen, skriv dei på hjartetavla!

⁴ Då får Gud og menneske velvilje for deg og ser ditt gode vit.

⁵ Lit på HERREN av heile ditt hjarte, støtt deg ikkje på eiga innsikt.

⁶Ha han i tankar kvar du ferdast, så gjer han stigane dine jamne.

⁷ Ver ikkje vis i eigne auge, frykt HERREN og vend deg bort frå det vonde!

⁸Det blir til helse for kroppen, ein styrkedrikk for merg og bein.

⁹ Æra HERREN med det du eig, med førstegrøda av all di avling.

¹⁰ Då blir di matbu rikeleg fylt, pressekummane renn over av ny vin.

¹¹ Son min, forakt ikkje HERRENS formaning, mist ikkje motet når han refsar.

¹² For den HERREN elskar, refsar han, slik ein far gjer med ein son han har kjær.

¹³ [6] Sæl er den som finn Visdomen og vinn seg forstand!

¹⁴ For meir er ho verd enn sølv, ho gjev større vinning enn gull.

¹⁵ Ho er meir verdfull enn perler, av alle dine skattar er ingen som henne.

¹⁶Langt liv held ho i si høgre hand, i si venstre rikdom og ære.

¹⁷På vegane hennar er det herleg å fara, alle hennar stigar fører til fred.

¹⁸ [7] Eit livsens tre er ho for dei som held fast ved henne, lukkelege er dei som støttar seg til henne.

¹⁹ Med visdom grunnla HERREN jorda, han grunnfeste himmelen med forstand.

²⁰Ved kunnskapen hans vart djupa opna, og skyene lét dogg drypa.

²¹Son min, ta vare på klokskap og omtanke, slepp dei ikkje av syne!

²² Dei skal vera til liv for deg, ei vakker kjede om halsen.

²³ Då kan du vandra trygt på din veg og ikkje støyta foten mot noko.

²⁴ Du er ikkje redd når du går til ro, og når du har lagt deg, søv du så godt.

²⁵ Du blir ikkje redd for uventa fare når øydelegginga kjem for dei urettferdige.

²⁶For HERREN skal vera ved di side, han skal vakta foten din for snara.

²⁷ Når det står i di makt å gjera det gode, skal du ikkje halda det tilbake frå den som har rett på det.

²⁸ Om du har noko, sei ikkje då til din neste: «Kom att, i morgon skal du få!»

²⁹Legg ikkje vonde planar mot din neste, som trur det er trygt å vera grannen din.

³⁰Trett ikkje med nokon utan grunn når han ikkje har gjort deg vondt.

³¹ Misunn ikkje ein valdsmann! Hans vegar må du aldri velja.

³² For HERREN avskyr den som er falsk, men talar fortruleg med dei rettskafne.

³³ HERREN forbannar huset til dei urettferdige, men heimen til dei rettferdige velsignar han.

³⁴ Spottarar svarar han med spott, men dei audmjuke gjev han nåde.

³⁵Dei vise arvar ære, men dårar må bera si skam.