Read nynorsk 2011 Ordtaka 31 Bible Online

Ordtaka 31 - nynorsk 2011 bible

Ordtaka 31

¹[43] Ord frå kong Lemuel, lærdom mor hans gav han.

²Min son, du son som eg bar, min lovnads-son:

³ Gjev ikkje di kraft til kvinner, ditt liv til det som øydelegg kongar.

⁴ Det sømer seg ikkje for kongar, Lemuel, det sømer seg ikkje for kongar å drikka vin eller for fyrstar å trå etter sterk drikk.

⁵ Då vil dei drikka og gløyma lovboda og fordreia retten for alle undertrykte.

⁶Men gjev sterk drikk til den som går til grunne, og vin til den som er bitter til sinns.

⁷Lat han drikka og gløyma sin fattigdom så han ikkje meir hugsar si naud.

⁸ Lat opp din munn for den som ikkje sjølv kan tala, før saka for dei som held på å bukka under.

⁹Lat opp din munn og døm rettferdig, lat hjelpelause og fattige få sin rett! Alef א

¹⁰ [44] Ei dugande kone, kven finn vel henne? Langt meir enn perler er ho verd. Bet ב

¹¹Mannen lit på henne i sitt hjarte, og vinning manglar han ikkje. Gimel ג

¹²Ho gjer berre godt mot han, ikkje noko vondt så lenge ho lever. Dalet ד

¹³Ho skaffar seg ull og lin, hendene arbeider med liv og lyst. He ה

¹⁴Ho er som handelsskipa, ho skaffar mat langt bortanfrå. Waw ו

¹⁵Før det lysnar av dag, er ho oppe, gjev huslyden mat og set tenestejentene i arbeid. Zajin ז

¹⁶Ho ser seg ut eit jordstykke og kjøper det; for det ho har tent, plantar ho ei vinmark. Het ח

¹⁷Styrke er beltet ho har om livet, ho tek i med sterke armar. Tet ט

¹⁸Ho merkar at forretningane går godt, lampa hennar sloknar ikkje om natta. Jod י

¹⁹Ho legg hendene på rokken, og fingrane grip om teinen. Kaf כ

²⁰ Ho opnar handa for den som lid naud, retter hendene ut til den fattige. Lamed ל

²¹Kjem det snø, er ho ikkje redd for sine, for alle i huset har ekstra klede. Mem מ

²²Ho lagar sine eigne teppe, ho har klede av lin og purpur. Nun נ

²³ [45] Mannen hennar er akta i byporten, der han sit med dei eldste i landet. Samek ס

²⁴Ho lagar linklede som ho sel, og sender belte til kjøpmannen. Ajin ע

²⁵Styrke og vørdnad er hennar klednad, ho ler mot komande dagar. Pe פ

²⁶ Ho opnar munnen med visdom, kjærleg rettleiing har ho på tunga. Tsade צ

²⁷ Ho ser etter korleis det går i huset, og et ikkje latskaps brød. Qof ק

²⁸Borna stig fram og prisar henne lukkeleg, mannen gjev henne ros: Resj ר

²⁹«Mange kvinner har vist at dei er dugande, men du overgår dei alle.» Sjin ש

³⁰Ynde sviktar, og venleik forgår, men ei kvinne som fryktar HERREN, skal ha ros. Taw ת

³¹Pris henne for frukta av arbeidet hennar, gjerningane skal gje henne ros i byens portar.