Read nynorsk 2011 Ordtaka 4 Bible Online

Ordtaka 4 - nynorsk 2011 bible

Ordtaka 4

¹Høyr etter, born, når far formanar, lytt, så de vinn forstand!

²God er den lærdomen eg gjev dykk. Forkast ikkje mi rettleiing!

³Då eg var barn heime hos far, ein sart liten gut, den einaste hos mor,

⁴ då lærte han meg: «Hjartet ditt skal halda fast ved mitt ord, hald boda mine, så skal du leva!

⁵Kjøp deg visdom, kjøp deg innsikt! Gløym ikkje orda frå min munn, snu deg ikkje frå dei.

⁶ [8] Forlat ikkje Visdomen, så vaktar ho deg, elsk henne, så vernar ho deg.

⁷Visdom er viktigast. Kjøp deg visdom, kjøp deg innsikt med alt du eig!

⁸Set henne høgt, så lyfter ho deg. Ta henne i famn, så gjev ho deg ære.

⁹ Ho set ein vakker krans på hovudet ditt og gjev deg ei strålande krone.»

¹⁰ Høyr etter, son, ta imot mine ord, så blir dine leveår mange.

¹¹ Visdoms veg lærer eg deg og fører deg på dei rette stigar.

¹² Når du går, skal ingenting hindra foten, når du spring, skal du aldri snubla.

¹³ Hald fast ved formaninga, slepp henne ikkje, ta vare på henne, for ho er ditt liv.

¹⁴ På stigen åt urettferdige må du ikkje gå inn, følg ikkje vegen dei vonde går!

¹⁵Sky han og hald deg unna, vend deg frå han og gå utanom!

¹⁶Dei urettferdige får ikkje sova om dei ikkje har gjort noko vondt. Har dei ikkje ført nokon til fall, blir dei liggjande søvnlause.

¹⁷Urett er brødet dei et, vald er vinen dei drikk.

¹⁸Men dei rettferdiges stig er lik morgonròden, som veks og klårnar mot høglys dag.

¹⁹ Vegen åt urettferdige er som kolmørkret; dei veit ikkje kva dei kan snubla i.

²⁰ Son min, lytt når eg talar, vend øyret til mine ord!

²¹ Slepp dei aldri av syne, gøym dei djupt i hjartet!

²² Dei er liv for den som finn dei, og gjev helse til heile kroppen.

²³Ta vare på hjartet framfor alt, for livet går ut frå det.

²⁴Lat aldri munnen tala falske ord, hald leppene borte frå svik!

²⁵Lat auga dine sjå beint fram, fest blikket på det som ligg framføre!

²⁶Gjer stigen jamn der foten skal gå, då blir alle dine vegar trygge.

²⁷ Vik ikkje av til høgre eller venstre, hald foten din borte frå det vonde!