Read nynorsk 2011 Ordtaka 5 Bible Online

Ordtaka 5 - nynorsk 2011 bible

Ordtaka 5

¹ Son min, gjev akt på min visdom, vend øyret til mi innsikt,

²så du tek vare på omtanke og leppene held på kunnskap.

³ Honning dryp frå leppene til ei framand kvinne, sleipare enn olje er munnen hennar.

⁴ Men ettersmaken blir beisk som malurt, kvass som eit tvieggja sverd.

⁵ Føtene hennar stig ned i døden, beint til dødsriket går hennar steg.

⁶Ho banar seg ikkje ein veg som gjev liv, ho vinglar vegvill, men veit det ikkje.

⁷Og no, høyr på meg, mine søner, vik ikkje av frå dei orda eg talar!

⁸Lat vegen din vera langt frå henne, kom ikkje nær til hennar dør!

⁹ Elles må du gje di kraft til andre, dine år til ein nådelaus herre.

¹⁰Andre får metta seg av det du eig, det du vann med ditt strev, går til framand manns hus.

¹¹Så må du stønna når slutten kjem, når din kropp og ditt kjøt tærest bort

¹²og du må seia: «Korleis kunne eg hata formaning og hjartet mitt forakta ord som viste til rette!

¹³Eg høyrde ikkje på dei som rettleidde meg, og lytta ikkje til lærarane mine.

¹⁴ [9] Det var nesten gått meg ille, og det framfor heile forsamlinga!»

¹⁵ Drikk vatn av din eigen brønn, det som flyt frå di eiga kjelde!

¹⁶Skulle kjeldene dine renna ut som rennande vatn på torga?

¹⁷Dei skal vera berre for deg og ikkje delast med framande.

¹⁸ Velsigna vere di eiga kjelde! Gled deg over din ungdoms kvinne,

¹⁹ei lysten hind, ei smidig fjellgeit. Drikk deg alltid utørst ved hennar bryst, lat hennar kjærleik stadig gjera deg ør!

²⁰ Kvifor, min son, bli ør av ei anna kvinne, kvifor ta framand kvinne i famn?

²¹ For HERRENS auge ser kvar mannen går, og gjer alle hans stigar jamne.

²² Den urettferdige blir fanga av si eiga skuld, syndene held han fast som reip.

²³Han døyr fordi han ikkje lét seg formana, i sin store dumskap fer han vill.