Read nynorsk 2011 Ordtaka 6 Bible Online

Ordtaka 6 - nynorsk 2011 bible

Ordtaka 6

¹ Son min, har du kausjonert for ein annan og gjeve handslag til ein framand,

²har orda dine fått deg i snara, er du fanga av det du har sagt,

³så gjer då dette og berga deg, son, sidan ein annan har fått makt over deg: Gå av stad, ver audmjuk, treng deg inn på mannen!

⁴ Unn deg ikkje blund på auga, og lat ikkje augneloka kvila!

⁵Berg deg unna som ein gasell frå jegeren, som ein fugl frå fangarens hand!

⁶Gå til mauren, du late, sjå kva han gjer, og bli vis!

⁷Han har ingen hærførar, korkje oppsynsmann eller herskar.

⁸ Likevel syter han for mat om sommaren og samlar inn føde om hausten.

⁹Kor lenge vil du liggja, du late, når vil du vakna og stå opp?

¹⁰ Berre sov litt til, ein ørliten blund, legg hendene saman og kvil deg ei stund.

¹¹Då kjem fattigdom på deg som farande fant og nauda som velvæpna mann.

¹²Eit vondsinna menneske, ein ugjerningsmann, er den som går omkring med falsk tunge,

¹³ som sender hånlege blikk med auga, skrapar med foten og gjer teikn med fingrane.

¹⁴Han har svik i hjartet og tenkjer ut vondt, alltid skaper han strid.

¹⁵Difor kjem ulukka brått over han, med eitt blir han knust og kan ikkje lækjast.

¹⁶ [10] Seks er dei ting som HERREN hatar, og sju har han avsky for:

¹⁷ hovmodige auge og svikefull tunge, hender som auser ut skuldlaust blod,

¹⁸ eit hjarte som legg vonde planar, raske føter som spring etter vondt,

¹⁹ det falske vitnet som fer med løgn, og den som skaper strid mellom brør.

²⁰ Son min, hald fast på boda som far din gav deg, forkast ikkje rettleiing frå mor di!

²¹ Bind dei alltid til hjartet ditt, knyt dei om halsen!

²² Når du går, skal dei leia deg, når du ligg, skal dei verna deg, og når du vaknar, skal dei tala til deg.

²³ For bodet er ei lykt og rettleiinga eit lys, formaning og tilrettevising er vegen til livet.

²⁴ Dei skal verna deg mot ei vond kvinne, mot den sleipe tunga til ei framand kvinne.

²⁵Trå ikkje etter venleiken hennar i ditt hjarte, lat henne ikkje fanga deg med sine augnekast!

²⁶Ei hore kan du få for ein brødleiv, men ei kvinne som høyrer ein annan til, driv jakt på eit dyrebart liv.

²⁷Kan ein sanka glør i fanget utan at kleda tek til å brenna?

²⁸Eller kan ein gå på glødande kol utan at føtene blir svidde?

²⁹Slik går det med den som går inn til ein annan manns kone. Ingen som rører henne, kjem ustraffa frå det.

³⁰ [11] Ingen foraktar ein tjuv når han stel for å stilla svolten.

³¹ [12] Men blir han gripen, må han bøta sjudobbelt, han må gje frå seg alt det han har i huset.

³²Vitlaus er den som driv hor med ei kvinne, slikt gjer berre den som vil øydeleggja livet sitt!

³³Skam og skade får han, og ingen stryk ut hans vanære.

³⁴For sjalusi vekkjer harme i mannen, han viser ingen nåde den dag han tek hemn.

³⁵Bøter bryr han seg ikkje om, stikk du til han store summar, tek han ikkje imot.