Read nynorsk 2011 Ordtaka 7 Bible Online

Ordtaka 7 - nynorsk 2011 bible

Ordtaka 7

¹Son min, ta vare på orda mine, gøym boda mine hos deg!

² Hald fast på boda, så skal du leva, ta vare på mi rettleiing som din augnestein!

³ Bind dei fast til fingrane, skriv dei på di hjartetavle!

⁴ [13] Sei til Visdomen: «Du er syster mi», kall innsikt for din nære slektning.

⁵ Så vaktar dei deg mot annan manns kone, ei framand kvinne som lokkar så fint.

⁶Eg stod ved vindauget i huset mitt, kikka ut gjennom gitterverket.

⁷Då såg eg han blant dei urøynde, la merke til han mellom dei unge, ein ung mann utan forstand.

⁸Han gjekk over gata ved hennar hjørne og styrte stega mot huset hennar.

⁹I skumringa var det, om kvelden, då nattemørkret fall på.

¹⁰Då kjem kvinna imot han, kledd som ei hore, med listig hjarte.

¹¹Rastlaus er ho, og ustyrleg, heime har føtene inga ro.

¹² Snart er ho på gata og snart på torget, ved kvart eit gatehjørne står ho på lur.

¹³Ho tek tak i han og kysser han, med ei frekk mine seier ho:

¹⁴ [14] «Eg hadde lova å bera fram eit fredsoffer, i dag har eg halde lovnaden min.

¹⁵Difor gjekk eg ut for å møta deg, eg leita etter deg og fann deg.

¹⁶Eg har lagt teppe på senga mi, fargerikt lin frå Egypt,

¹⁷ [15] og over leiet har eg strødd myrra, aloe og kanel.

¹⁸Kom, lat oss drikka djupt av kjærleiken, fryda oss i elskhug til morgonen gryr.

¹⁹For mannen min er ikkje heime, han er ute på langferd.

²⁰Pengepungen tok han med seg, først ved fullmåne kjem han heim.»

²¹Ho overtala han etter beste evne, med glatte lepper forførte ho han.

²² [16] Han følgjer etter henne med det same, lik ein okse dei fører til slakting, lik ein hjort som går rett i fella,

²³til pila borar seg inn i levra. Han liknar fuglen som flyg mot snara, han skjønar ikkje at det gjeld livet.

²⁴Så høyr no på meg, søner, lytt til orda frå min munn!

²⁵Lat ikkje hjartet venda seg til hennar vegar, villa deg ikkje inn på stigane hennar!

²⁶For ho har gjeve banesår til mange, talrike er dei ho har felt.

²⁷ Huset hennar er vegen til dødsriket, ned til dødens salar.