Read nynorsk 2011 Ordtaka 9 Bible Online

Ordtaka 9 - nynorsk 2011 bible

Ordtaka 9

¹ [20] Visdomen har bygd seg hus og hogge til sine sju søyler.

²Ho har slakta fe og blanda vin, og ho har dekt på bordet.

³ Ho har sendt tenestejentene ut, ho ropar oppe frå høgdene i byen:

⁴«Du som er urøynd, vend deg hit!» Til den vitlause seier ho:

⁵ «Kom og et av maten min og drikk av vinen eg har blanda.

⁶Lat vitløysa fara, så skal de leva, gå fram på den vegen forstanden viser!»

⁷Den som åtvarar ein spottar, får skam, den som går i rette med ein urettferdig, lid skade.

⁸ Gå ikkje i rette med spottaren, då hatar han deg, gå i rette med den vise, så elskar han deg.

⁹Gjev til den vise, så blir han visare, lær den rettferdige, så aukar han sin lærdom.

¹⁰ [21] Å frykta HERREN er opphav til visdom, å ha den kunnskap dei heilage har, er forstand.

¹¹ Ved meg skal dine dagar bli mange, og du får fleire leveår.

¹²Er du vis, blir din visdom til nytte for deg, spottar du, må du lida for det sjølv.

¹³Dårskapen er ei rastlaus kvinne, vitlaus er ho og forstår ikkje noko.

¹⁴Ho sit utfor husdøra si, har sitt sete høgt oppe i byen.

¹⁵Ho ropar til alle som går forbi, dei som går beint fram på vegen:

¹⁶«Du som er urøynd, vend deg hit!» Til den vitlause seier ho:

¹⁷ «Stole vatn smakar godt, herleg er maten ein et i løynd.»

¹⁸ Men han skjønar ikkje at det er daudingar der, at gjestene hennar er frå djupaste dødsriket.