Read nynorsk 2011 Forkynnaren 12 Bible Online

Forkynnaren 12 - nynorsk 2011 bible

Forkynnaren 12

¹ [10] Tenk på din skapar i ungdoms år, før dei vonde dagane kjem, før dei åra kjem då du må seia: «Eg har inga glede av dei»,

²før sol og dagslys, måne og stjerner blir mørke og skyene kjem att etter regnet.

³ [11] Då skjelv tenarane i huset, dei sterke mennene blir krokete. Kvinnene som mel på kverna, held opp, for dei har vorte så få; og det mørknar for jentene som ser ut gjennom gluggane.

⁴ [12] Begge dørene mot gata blir stengde, og duren frå kverna blir døyvd. Ein står opp til fuglekvitter, men alle songens døtrer stilnar.

⁵ [13] Då ottast ein for kvar bakke, og farar lurer på vegen. Mandeltreet blømer, grashoppa slepar seg fram, og kapersfrukta brest medan mennesket går til sin siste bustad; dei som skal gråta, er alt på gata.

⁶ [14] Ja, tenk på din skapar før sølvsnora slitnar og gullskåla brest, før krukka går sund attmed kjelda og hjulet brotnar og fell i brønnen,

⁷ når støvet vender attende til jorda som det støvet det var, og ånda går til Gud, som gav henne.

⁸Fåfengt og forgjengeleg, seier Forkynnaren, ja, alt er forgjengeleg!

⁹Forkynnaren var ikkje berre vis, han gav òg folket kunnskap. Han grunda og granska og laga mange ordtak.

¹⁰Forkynnaren la vinn på å finna gode ord og vendingar og skreiv ned det som er rett og sant.

¹¹ [15] Ord av vismenn er som broddar, fyndord i samling er som naglar sette inn av ein gjetar.

¹²Men elles, son min, ta deg i vare: Det er ingen ende på dei bøkene som blir skrivne, og mykje gransking gjer kroppen trøytt.

¹³ Dette er summen av alt du har høyrt: Ottast Gud og hald hans bod! Dette er det som alle menneske har fått.

¹⁴ For Gud skal dømma kvar gjerning, halda dom over alt som er løynt, anten det er godt eller vondt.