Read nynorsk 2011 Høgsongen 2 Bible Online

Høgsongen 2 - nynorsk 2011 bible

Høgsongen 2

¹Eg er blomen frå Saron, lilja i dalen.

² Som ei lilje mellom tistlar, slik er mi kjære mellom døtrene.

³ Som ein apal mellom trea i skogen, slik er kjærasten min mellom sønene. Å sitja i skuggen hans er ei nyting, hans frukt er søt for ganen.

⁴Inn i vinhuset har han ført meg, hans merke over meg er kjærleik.

⁵Styrk meg med rosinkaker, kveik meg med eple! For eg er sjuk av kjærleik.

⁶ Venstre armen hans er under hovudet mitt, med den høgre held han rundt meg.

⁷ Eg bed dykk, de Jerusalems døtrer, ved gasellane eller ved hindene i marka: Uroa ikkje kjærleiken! Vekk han ikkje før han sjølv vil!

⁸Høyr, det er kjærasten, der kjem han, springande over fjell, hoppande over haug.

⁹Kjærasten liknar ein gasell, ein ung hjort. Der står han bak muren vår. Han gløtter inn gjennom vindauga, kikkar inn gjennom gitteret.

¹⁰Kjærasten tek til orde og seier: Stå opp, mi kjære, mi vakre jente, og kom!

¹¹No er vinteren over, regnet er forbi, det er borte.

¹²Landet blir dekt av blomar. Songtida er her, turteldua kan høyrast i landet.

¹³Frukta på fikentreet mognar, og blomen på vinstokken angar. Stå opp, mi kjære, mi vakre jente, og kom!

¹⁴ Mi due i fjellkløfta, i livd under bratte berg, lat meg få sjå deg, lat meg få høyra røysta di! For røysta er mjuk og skapnaden vakker.

¹⁵Fang revane for oss, dei små revane som øydelegg vinmarkene. For vinmarkene våre står i blom.

¹⁶ Kjærasten er min, og eg er hans, han som gjeter mellom liljene.

¹⁷ Heilt til dagen blæs skuggane bort, spring som gasellen, kjærasten min, som ein ung hjort over kløfter og fjell!