Read nynorsk 2011 Høgsongen 7 Bible Online

Høgsongen 7 - nynorsk 2011 bible

Høgsongen 7

¹Så vakkert du stig i sandalar, du hovdingdotter! Hoftene dine rundar seg som ei sølje, smidd av kunstnarhand.

²Navlen din er ei rund skål, måtte han aldri mangla vin! Magen er ein kveiteåker kransa inn av liljer.

³ Brysta dine er som to kalvar, tvillingar til ein gasell.

⁴ [12] Halsen din er som eit elfenbeinstårn, auga som dammane i Hesjbon ved Bat-Rabbim-porten. Nasen er som Libanon-tårnet som ser mot Damaskus.

⁵Hovudet kronar deg som Karmel, håret skimrar som purpur. Kongen er fanga i lokkane.

⁶Så vakker du er, så nydeleg, du som eg elskar, full av lyst!

⁷Du er høg som palmen, og brysta dine er som drueklasar.

⁸Eg seier: Eg skal opp i den palmen, gripa tak i dei greinene. Brysta dine skal vera som klasane på vinstokken, din ande som angen av eple

⁹og ganen som den finaste vin, som lett går ned hos kjærasten min, som glir over leppene mine og tennene!

¹⁰ Eg høyrer kjærasten til, og til meg står hans trå.

¹¹ Kom, kjærasten min! Lat oss gå ut på marka! Vi overnattar mellom hennabuskar.

¹²Ved daggry går vi til vinmarkene, ser om vinstokken har sett nye skot, om blomeknoppane har opna seg, om granataplane blømer. Der vil eg gje deg min kjærleik.

¹³ [13] Kjærleiksepla angar, ved døra heng alle slag herleg frukt, både nyplukka og tørka. Kjærasten min, eg har gøymt dei til deg.