Read nynorsk 2011 Jesaja 13 Bible Online

Jesaja 13 - nynorsk 2011 bible

Jesaja 13

¹[41] Ein bodskap om Babel som Jesaja, son til Amos, fekk sjå:

² [42] Lyft banneret på snaue fjellet, rop høgt til dei, vink med handa så dei kan dra inn gjennom storfolks portar.

³Eg har sjølv kalla inn mine heilage krigarar som skal tena min vreide, eg har samla mine krigsmenn, dei som jublar over mitt velde.

⁴Høyr ståket på fjella som frå eit stort folk! Høyr larmen av kongerike, folkeslag som samlar seg! HERREN over hærskarane mønstrar ein hær til strid.

⁵Frå eit land langt borte, der himmelen endar, kjem HERREN og den reiskapen han bruker i sin harme for å øydeleggja heile jorda.

⁶ [43] Klag, for HERRENS dag er nær. Som vald frå Den veldige kjem han.

⁷ Difor blir alle hender slappe, kvart menneskehjarte smeltar bort.

⁸ Dei blir slegne av skrekk, dei blir gripne av krampe og smerte, dei får rier lik ei kvinne som skal føda. I redsle stirer dei på kvarandre, andleta er som eld.

⁹ Sjå, HERRENS dag kjem med gru og harme og brennande vreide for å leggja jorda aud og utrydda syndarane der.

¹⁰ For stjernene på himmelen og stjernebileta lèt ikkje lyset skina, mørk er sola når ho står opp, og månen gjev ikkje lys.

¹¹ Eg krev jorda til rekneskap for vondskapen og dei lovlause for deira synd. Eg gjer ende på dei stolte og frekke og slår ned hovmodige valdsmenn.

¹² Eg gjer menneske meir sjeldne enn reint gull og folk meir sjeldne enn Ofir-gull.

¹³ Difor får eg himmelen til å skjelva, og jorda blir rist ut av lage fordi HERREN over hærskarane er harm, det er dagen for hans brennande vreide.

¹⁴Lik jaga gasellar og sauer som ingen sankar, skal kvar og ein venda seg til sitt eige folk og kvar og ein flykta til sitt eige land.

¹⁵Alle som blir funne, skal stikkast ned, og alle som blir gripne, skal falla for sverd.

¹⁶ Dei små borna skal knusast framfor auga på dei, husa skal plyndrast og kvinnene bli valdtekne.

¹⁷ Sjå, mot dei hissar eg medarane, dei bryr seg ikkje om sølv og har ikkje lyst på gull.

¹⁸ Bogane deira feller unge gutar, dei viser ikkje nåde mot frukta i mors liv, auga har ikkje medynk med born.

¹⁹ Med Babel, det herlegaste kongeriket, kaldearens stolte pryd, skal det gå som då Gud øydela Sodoma og Gomorra.

²⁰Aldri meir skal nokon slå seg ned der, frå slekt til slekt skal ingen bu der. Ingen ørkenbuar skal slå opp telt der og ingen gjetar la dyra kvila der.

²¹ [44] Men ørkendyr skal kvila der og husa fyllast av ugler. Der skal strutsar bu, og der skal bukkar dansa.

²²Hyenar skal ula i borgene og sjakalar i lystslotta. Babels time nærmar seg, hennar dagar blir ikkje mange.