Read nynorsk 2011 Jesaja 19 Bible Online

Jesaja 19 - nynorsk 2011 bible

Jesaja 19

¹Bodskap om Egypt. Sjå, HERREN rid på raske skyer og kjem til Egypt. Avgudane i Egypt skjelv for han, og hjartet til egyptarane smeltar i brystet.

² Eg hissar opp egyptar mot egyptar, bror skal kjempa mot bror, mann mot mann, by mot by, kongerike mot kongerike.

³ Det er tomt for ånd i egyptarane, eg gjer ende på planane deira. Dei vender seg til avgudar og skrømt, til gjenferd og spådomsånder.

⁴Men eg vil gje egyptarane over i hendene på ein hard herre. Ein mektig konge skal herska over dei, seier Herren, allhærs HERRE.

⁵Då blir vatnet i havet borte, elva blir tørrlagd, ho tørkar.

⁶Elvefara stinkar, Nilens armar minkar og blir tørrlagde, røyr og siv visnar.

⁷Graset ved munningen av Nilen og alt som er sådd langs elva, tørkar, blæs bort og forsvinn.

⁸Fiskarane sørgjer, alle som fiskar med krok i Nilen, klagar, dei som set garn i vatnet, visnar bort.

⁹Dei som arbeider med lin, blir til skamme, dei som kardar og vev, blir bleike.

¹⁰Vevarane sturer, dagarbeidarane er tunge til sinns.

¹¹ [60] Ja, dårar er fyrstane i Soan, vismennene til farao gjev dumme råd. Korleis kan de seia til farao: «Eg er son til vismenn, son til kongar frå fortida?»

¹²Kvar er no vismennene dine? Lat dei kunngjera og fortelja deg kva plan HERREN over hærskarane har lagt for egyptarane.

¹³ [61] Fyrstane i Soan er dårar, fyrstane i Nof har vorte narra. Stammehovdingane har ført Egypt vill.

¹⁴ HERREN har aust ut blant dei ei ånd som gjer svimmel. Dei har fått egyptarane til å fara vill kva dei så gjer, slik ein drukken går seg vill i sitt eige spy.

¹⁵ For egyptarane skal ingenting lukkast, anten det er hovud eller hale, palmegrein eller siv som gjer det.

¹⁶Den dagen skal egyptarane vera som kvinner. Dei skal skjelva av frykt fordi HERREN over hærskarane har lyft si hand og svingar henne over dei.

¹⁷Juda-landet skal bli til skrekk for egyptarane. Så ofte nokon nemner det, skal dei frykta planen HERREN over hærskarane har lagt for dei.

¹⁸[62] Den dagen skal det vera fem byar i Egypt som talar Kanaans språk og sver truskap til HERREN over hærskarane. Ein av dei skal heita Ir-Haheres.

¹⁹Den dagen skal det vera eit altar for HERREN midt i Egypt og ei steinstøtte for HERREN ved grensa.

²⁰Det skal vera til teikn og vitnemål for HERREN over hærskarane i Egypt. Når dei ropar til HERREN og klagar over undertrykkjarane, skal han senda dei ein frelsar og stridsmann, og han skal fria dei ut.

²¹Då skal HERREN gje seg til kjenne for egyptarane, på den dagen skal egyptarane læra han å kjenna. Dei skal dyrka han med slaktoffer og grødeoffer, gje lovnader til han og halda dei.

²²HERREN skal slå egyptarane, slå, men lækja òg. Dei skal venda om til HERREN, og han vil høyra bønene deira og lækja dei.

²³Den dagen skal det vera ein hovudveg frå Egypt til Assur. Assyrarane skal koma til Egypt og egyptarane til Assur, og Egypt skal tilbe saman med Assur.

²⁴Den dagen skal Israel, den tredje saman med Egypt og Assur, vera ei velsigning for heile jorda.

²⁵HERREN over hærskarane skal velsigna dei og seia: Velsigna er Egypt, mitt folk, Assur, eit verk av mi hand, og Israel, min eigedom!