Read nynorsk 2011 Jesaja 2 Bible Online

Jesaja 2 - nynorsk 2011 bible

Jesaja 2

¹Ordet som Jesaja, son til Amos, såg om Juda og Jerusalem:

² I dei siste dagar skal det skje at HERRENS tempelberg skal stå urokkeleg som det høgaste av fjella og raga over høgdene. Dit skal alle folkeslag strøyma.

³ Mange folk skal dra av stad og seia: «Kom, lat oss gå opp til HERRENS fjell, til huset åt Jakobs Gud, så han kan læra oss sine vegar og vi kan ferdast på hans stigar. For lov skal gå ut frå Sion, HERRENS ord frå Jerusalem.»

⁴ Han skal dømma mellom folkeslag og skifta rett for mange folk. Dei skal smi sverda om til plogskjer og spyda til vingardsknivar. Folk skal ikkje lyfta sverd mot folk, ikkje lenger lærast opp til krig.

⁵Kom, Jakobs hus, lat oss vandra i HERRENS lys!

⁶Du har forkasta folket ditt, Jakobs hus. For der er det fullt av spådomar og av teikntydarar, som hos filistrane, overalt er det framande.

⁷Landet er fullt av sølv og gull, overalt er det skattkammer. Landet er fullt av hestar, overalt er det vogner.

⁸ Landet er fullt av avgudar, folk tilbed noko dei sjølve har laga med sine eigne hender og fingrar.

⁹Mennesket er bøygd, kvar mann er fornedra. Tilgjev dei ikkje!

¹⁰ Gå inn i fjellet, gøym deg i jorda for redsla som HERREN vekkjer, for hans stordom og velde!

¹¹ Den stolte må slå auga ned, hovmodet hos menn skal bøyast. HERREN åleine er opphøgd den dagen.

¹²For det kjem ein dag frå HERREN over hærskarane då alt som er hovmodig og høgt, alt som kneisar, skal fornedrast,

¹³alle sedrar på Libanon, så høge og kneisande dei er, alle eiker i Basan,

¹⁴alle høge fjell, alle kneisande høgder,

¹⁵alle opphøgde tårn og alle festningsmurar,

¹⁶ [7] alle Tarsis-skip og alle herlege skuter.

¹⁷Då blir det stolte mennesket bøygd og hovmodet hos menn fornedra. HERREN åleine er opphøgd den dagen.

¹⁸Med avgudane er det slutt for alltid.

¹⁹ Då skal folk gøyma seg i fjellgrotter og jordhòler for redsla HERREN vekkjer, for hans stordom og velde når han reiser seg for å slå jorda med skrekk.

²⁰ Den dagen skal menneska kasta frå seg til moldvarp og flaggermus gudebileta av sølv og gull som dei har laga seg og tilbed.

²¹Dei skal gøyma seg i fjellhòler og bergkløfter for redsla HERREN vekkjer, for hans stordom og velde når han reiser seg for å slå jorda med skrekk.

²² Hald opp med å stola på mennesket som berre har pust i nasen. Kva er vel mennesket å rekna for?