Read nynorsk 2011 Jesaja 21 Bible Online

Jesaja 21 - nynorsk 2011 bible

Jesaja 21

¹[63] Bodskap om ørkenen ved havet. Som stormen fer gjennom Negev, slik kjem det frå ørkenen, frå landet der redsle rår.

²Eit hardt syn har eg fått sjå: Svikarar svik, hærmenn herjar. «Fram, du Elam! Til åtak, du Media! Kvart sukk gjer eg ende på.»

³ Difor rykkjer det i hoftene mine, rier tek meg som hos ei fødande kvinne. Eg er så forvirra at eg ikkje kan høyra, så redd at eg ikkje kan sjå.

⁴Mitt hjarte går seg vill, eg skjelv av redsle. Kvelden, som var min lengt, er no min skrekk.

⁵ Dei dekkjer bord, dei breier ut teppe, dei et og drikk. «Opp, hovdingar, smør skjoldet!»

⁶ For så sa Herren til meg: «Set ut ein vaktpost! Det han ser, skal han melda!

⁷Ser han eit tog med hestespann, eit tog med esel, eit tog med kamelar, då skal han lytta, lytta og lytta!»

⁸ Og vaktmannen ropa: «HERRE, dagen lang står eg på vakt, eg er på min post kvar einaste natt.

⁹ Sjå, der kjem eit tog av vogner med folk og hestespann.» Så tok han til ords og sa: «Fallen, fallen er Babel! Alle gudebileta i byen ligg knuste på jorda.»

¹⁰Å, mitt folk, du som er treskt på treskjeplassen! Det eg har høyrt frå HERREN, allhærs Gud, Israels Gud, det har eg kunngjort for dykk.

¹¹[64] Bodskap om Duma. Nokon ropar til meg frå Se'ir: «Vektar, kor langt på natt, vektar, kor langt på natt?»

¹²Vektaren svarar: «Det kjem ein morgon, men òg ei natt. Vil de spørja, så spør! Kom att ein annan gong!»

¹³Bodskap om øydemarka. De skal overnatta i krattet i øydemarka, karavanar frå Dedan!

¹⁴Møt dei tørste og gjev dei vatn, de som bur i Tema! Gå med brød til flyktningane!

¹⁵For dei har flykta for sverd, for dregne sverd og spente bogar og krigens tyngd.

¹⁶For så har Herren sagt til meg: Om eitt år, slik leigefolk reknar året, skal det vera slutt på all herlegdomen i Kedar.

¹⁷Det blir ikkje mange att av bogane til Kedar-heltane. For HERREN, Israels Gud, har tala.