Read nynorsk 2011 Jesaja 24 Bible Online

Jesaja 24 - nynorsk 2011 bible

Jesaja 24

¹Sjå, HERREN herjar jorda og legg henne aud, vrid andletet hennar og spreier dei som bur der.

²Då går det folk som prest, slave som herre, slavekvinne som husfrue, kjøpar som seljar, långjevar som låntakar, innkrevjar som skuldnar.

³Herjast, herjast skal jorda og plyndrast, plyndrast, for dette ordet har HERREN tala.

⁴ Jorda sørgjer og visnar, verda tørkar bort og visnar, både jorda og det høge tørkar bort.

⁵Jorda er vanhelga av dei som bur der. For dei har sett seg ut over lover, forandra forskrifter, brote den evige pakta.

⁶Difor blir jorda fortært av forbanning. Dei som bur der, må bøta for si skuld. Difor brenn dei som bur på jorda, berre ein liten rest blir att.

⁷Den nye vinen sørgjer, vinstokken tørkar bort, alle som gledde seg i hjarta, dei sukkar.

⁸ Dei glade trommene teier, lyden av jubel stilnar, den glade lyra teier.

⁹Folk drikk ikkje vin til song, det sterke smakar bittert for den som drikk.

¹⁰Knust er den aude byen, stengt er kvart hus, ingen slepp inn.

¹¹I gatene er det klagerop, dei har ikkje vin, all glede har mørkna, fryd er vist bort frå landet.

¹²Byen er øydelagd, porten er knust.

¹³ For blant folka på jord skal det bli som når ein slår ned oliven, som når dei siste druene blir plukka.

¹⁴Dei ropar høgt og jublar over HERRENS velde. Dei ropar av glede i vest.

¹⁵«Så gjev ære til HERREN i aust, til namnet åt HERREN, Israels Gud, ved kystane i vest!»

¹⁶Frå enden av jorda høyrer vi songar som prisar Den rettferdige. Men eg må seia: Det er ute med meg, ute med meg, ve meg! Svikarar svik! Svik! Svikarar svik!

¹⁷Det blir gru og grav og garn for deg som bur på jorda!

¹⁸ Den som flyktar frå gru, skal falla i grav, kjem han seg opp or grava, skal han bli fanga i garnet. For slusene i det høge er opna, grunnvollane under jorda skjelv.

¹⁹Jorda rivnar og rister, jorda vaklar og vinglar, jorda skjelv og skakar,

²⁰jorda sjanglar som ein drukken og svaiar som eit skur. Synda ligg tungt på henne, ho fell og reiser seg ikkje meir.

²¹Den dagen skal HERREN straffa den høge hæren i det høge og kongane på jorda.

²²Dei skal samlast som fangar i eit hol, stengjast inne i eit fengsel og langt om lenge få si straff.

²³ Då skal månen bli til spott og sola til skamme. For HERREN over hærskarane er konge på Sion-fjellet og i Jerusalem. Hans eldste skal sjå hans herlegdom.