Read nynorsk 2011 Jesaja 25 Bible Online

Jesaja 25 - nynorsk 2011 bible

Jesaja 25

¹ HERRE, du er min Gud. Eg lovsyng deg og prisar ditt namn. Du har gjort under slik du planla i gammal tid, i truskap og sanning.

² [76] Byen gjorde du til ei steinrøys, festningsbyen til ein ruin. Borga til dei framande er ingen by meir. Aldri skal ho byggjast opp att.

³Difor skal eit mektig folk gje deg ære, folkeslag i valdsmenns by skal frykta deg.

⁴ Du vart eit vern for dei veike, eit vern for dei fattige i deira naud, ei livd mot styrtregn, ein skugge mot heten. For pusten frå valdsmenn er som styrtregn mot muren,

⁵som hete i eit uttørka land. Du får larmen frå dei framande til å stilna. Som ei sky gjev skugge mot heten, vart songen til valdsmenn dempa.

⁶ [77] På dette fjellet skal HERREN over hærskarane gjera i stand for alle folk eit festmåltid med feite retter, eit festmåltid med gammal vin, med feite, mergfulle retter og gammal, klåra vin.

⁷ På dette fjellet skal han sluka sløret som slører til alle folk, dekket som dekkjer til alle folkeslag.

⁸ Han skal sluka døden for evig. Herren GUD skal tørka tårene frå kvart andlet. Frå heile jorda skal han ta bort vanæra til folket sitt. For HERREN har tala.

⁹ Den dagen skal dei seia: «Sjå, dette er vår Gud! Vi vona på han, og han frelste oss. Dette er HERREN, vi vona på han. Lat oss jubla og gleda oss over hans frelse!»

¹⁰For HERRENS hand skal kvila over dette fjellet. Men Moab skal han trakka ned slik halm blir trakka ned i gjødselvatn.

¹¹Der strekkjer han ut hendene lik ein symjar som legg på sum. Men Gud slår hans hovmod ned sjølv om han kavar med hendene.

¹² Dine høge festningsmurar bryt han ned, riv dei ned til dei ligg på jorda, i støvet.