Read nynorsk 2011 Jesaja 26 Bible Online

Jesaja 26 - nynorsk 2011 bible

Jesaja 26

¹ Den dagen skal denne songen syngjast i Juda-landet: Byen er vår styrke. Til frelse reiser han vollar og vern.

² Lat portane opp så det rettferdige folket kan dra inn, dei som held fast ved sin truskap.

³Du gjev varig fred til dei som har eit stødig sinn, for dei stolar på deg.

⁴ Stol på HERREN til alle tider, for han, HERREN, er eit evig berg.

⁵ Han har bøygd dei som bur i det høge, den opphøgde byen riv han ned, riv ned til grunnen og legg han i støvet.

⁶ Fattige føter og svake steg skal trakka han under fot.

⁷For den rettferdige er vegen jamn. Jamn er stigen du bryt for den rettferdige,

⁸den vegen lovene dine viser. HERRE, vi har sett vår von til deg, sjela lengtar etter ditt namn og ditt minne.

⁹Mi sjel lengtar etter deg om natta, ja, ånda i meg leitar etter deg. For når dine lover gjeld på jorda, lærer dei rettferd, dei som bur i verda.

¹⁰Om den urettferdige får nåde, lærer han ikkje rettferd. Han gjer urett i rettens land og ser ikkje HERRENS velde.

¹¹ HERRE, di hand er lyft, men ingen ser det. Dei skal sjå din lidenskap for folket og skjemmast. Eld skal fortæra motstandarane dine!

¹² HERRE, du gjev oss fred, for alt vi har gjort, har du gjort for oss.

¹³ HERRE, vår Gud! Andre herrar enn du har herska over oss, berre deg og ditt namn vil vi prisa.

¹⁴ Døde blir ikkje levande, daudingar står ikkje opp. For du har kravd dei til rekneskap og gjort ende på dei, utsletta kvart minne om dei.

¹⁵Du har gjort folket større, HERRE, gjort folket større og vist din herlegdom, du har utvida alle grensene i landet.

¹⁶ HERRE, dei søkte deg i nauda og kviskra fram bøner då du straffa dei.

¹⁷ Slik ei kvinne vrid seg og skrik når riene kjem og ho skal føda, slik er vi for ditt andlet, HERRE.

¹⁸Vi var med barn, vi fekk rier, men vi fødde vind. Vi har ikkje skaffa landet frelse, ingen blir fødd til å bu på jorda.

¹⁹ Dine døde skal bli levande, mine lik skal stå opp. Vakna og rop av fryd, de som ligg i støvet! For di dogg er ei dogg av lys, og jorda gjer daudingar levande.

²⁰ Gå, mitt folk! Gå inn i dine rom og lat att dørene etter deg! Løyn deg ei lita stund til harmen er gått over!

²¹ Og sjå, HERREN går ut frå sin stad for å la dei som bur på jorda, stå til rekneskap for si synd. Jorda skal visa fram sitt blod og ikkje lenger løyna dei drepne.