Read nynorsk 2011 Jesaja 3 Bible Online

Jesaja 3 - nynorsk 2011 bible

Jesaja 3

¹ Sjå, Herren, allhærs HERRE, tek bort frå Jerusalem og Juda støtte og stav: kvar støtte av brød og kvar støtte av vatn,

²kvar krigar og stridsmann, dommar, profet, spåmann og eldste,

³femtimannsføraren og den fornemme mannen, rådgjevaren, trollmannen og den dyktige åndemanaren.

⁴ Så gjev eg dei gutar til leiarar, villstyringar skal herska over dei.

⁵Folket blir undertrykt, mann av mann og granne av granne, guten set seg opp mot den gamle, den låge mot den høge.

⁶Når ein mann tek tak i ein annan i farshuset sitt og seier: «Du har ei kappe, du skal vera hovding for oss, di hand skal rå over denne ruinhaugen»,

⁷då skal den andre ta til ords og seia: «Eg kan ikkje forbinda sår, og i huset mitt finst korkje brød eller klede. Set ikkje meg til hovding over folket!»

⁸ For Jerusalem har snubla, og Juda har falle, for med ord og gjerningar står dei HERREN imot, og dei set seg opp mot hans herlegdom.

⁹ [8] Andleta deira vitnar imot dei. Som Sodoma kunngjer dei si synd og løyner henne ikkje. Ve dei! Dei fører ulukke over seg sjølve.

¹⁰ Sæl er den rettferdige, for det går han godt, og han skal nyta frukta av sine gjerningar.

¹¹ Ve den urettferdige, han går det ille, han får att for det han har gjort.

¹² Folket mitt blir undertrykt av småborn, og kvinner herskar over det. Mitt folk, leiarane dine villeier deg og fører deg på villspor.

¹³ HERREN stig fram for å føra sak, han står opp for å dømma folka.

¹⁴ [9] HERREN held rettargang med dei eldste og stormennene i folket sitt. «Det er de som har beitt vingarden snau, det er rov frå dei fattige i husa dykkar!

¹⁵Kvifor knuser de mitt folk og mel sund andleta til dei hjelpelause?» seier Herren, allhærs GUD.

¹⁶ HERREN har sagt: Fordi Sions døtrer er stolte og går med kneisande nakke, blunkar med auga, trippar omkring og ringlar med fotringane sine,

¹⁷vil Herren la Sions døtrer få hovudet fullt av skurv, og HERREN vil snaua skallane deira.

¹⁸Den dagen skal Herren ta frå dei all stas: fotringane, solsmykka og halvmånane,

¹⁹øyredobbane, armbanda og sløra,

²⁰turbanane, fotkjedene og belta, amulettane og talismanane,

²¹fingerringane og naseringane,

²²festkleda, kåpene, sjala og veskene,

²³speglane, linskjortene, hovudplagga og skjerfa.

²⁴ Då blir det stank i staden for godlukt, reip i staden for belte, fleinskalle i staden for frisyre, sekkestrie i staden for stasklede, svimerke i staden for venleik.

²⁵ Mennene dine skal falla for sverd, hæren skal falla i krig.

²⁶Sions portar skal sørgja og klaga, ho sit forlaten på jorda.