Read nynorsk 2011 Jesaja 32 Bible Online

Jesaja 32 - nynorsk 2011 bible

Jesaja 32

¹ Sjå, med rettferd skal kongen råda og stormenn styra med rett.

² Dei skal vera som ei livd mot vinden og eit skjul mot styrtregn, som rennande bekker i tørt land, som skuggen av eit mektig berg på utpint jord.

³ Sjåande auge blir ikkje blinde, høyrande øyre skal lytta.

⁴Tankelause hjarte skal læra å skjøna, stammande tunger skal tala lett og klårt.

⁵Dåren skal ikkje lenger kallast stormann og kjeltringen ikkje kallast fornem.

⁶ For dåren talar dårskap, hjartet hans valdar vondt: Han gjer gudlaus gjerning, talar gale om HERREN, lèt den svoltne sakna mat og den tørste mangla drikke.

⁷ Våpna til kjeltringen er vonde. Han legg skamlause planar, vil skada dei hjelpelause med løgn når den fattige talar si sak.

⁸Men stormannen legg store planar. Han står fast på det som er stort.

⁹ Sorglause kvinner, stå opp, høyr mi røyst! Trygge døtrer, lytt til mitt ord!

¹⁰I dagar og år skal de skjelva, de trygge. For vinhausten slår feil, frukthausten kjem ikkje.

¹¹ [94] Skjelv, de sorglause, skjelv, de trygge! Kled dykk nakne, bind sekkestrie om hoftene!

¹²Dei klagar over brysta, over dei herlege åkrane, over dei grøderike vinstokkane,

¹³over jorda til folket mitt der torn og tistel skyt opp, ja, over kvart lukkeleg hus i den jublande byen.

¹⁴ For borga er oppgjeven og den larmande byen forlaten. Haug og vakttårn har for alltid vorte til gøymestader der villesel gleder seg og buskapar beiter,

¹⁵ heilt til Ande blir aust ut over oss frå det høge. Då skal ørkenen bli til ein frukthage, og ein frukthage skal reknast for skog.

¹⁶I ørkenen skal retten slå seg ned, i frukthagen skal rettferd bu.

¹⁷Då skal rettferds verk vera fred, rettferds gjerning tryggleik og ro til evig tid.

¹⁸ Mitt folk skal bu på ein fredeleg buplass, i trygge heimar og på sikre kvilestader.

¹⁹ Skogen skal fellast og falla, byen skal søkka i djupet.

²⁰Sæle er de som sår ved alle vatn, og som lèt okse og esel gå fritt omkring.