Read nynorsk 2011 Jesaja 34 Bible Online

Jesaja 34 - nynorsk 2011 bible

Jesaja 34

¹ Kom og høyr, de folkeslag, lytt, de folk! Jorda og alt som fyller henne, skal høyra, verda og alt som spirer der!

² [98] For HERREN er harm på alle folk, han er vreid på heile deira hær. Han har slege dei med bann og gjeve dei over til slakting.

³ Dei drepne blir slengde til sides, stank stig frå lika, og blod flyt på fjella.

⁴ [99] Oppløyst blir heile himmelhæren, som ein bokrull blir himmelen rulla saman. Heile hans hær skal visna som lauvet på vinstokken visnar og frukta på fikentreet skrumpar inn.

⁵For sverdet mitt har drukke seg utørst i himmelen, no fer det ned over Edom til dom over folket eg slår med bann.

⁶ [100] HERREN har eit sverd fullt av blod, det dryp av feitt, av blod frå lam og bukkar, av nyrefeitt frå vêrar. Det er offerslakting for HERREN i Bosra, stor nedslakting i Edom.

⁷Saman med dei skal villoksar falla, unge stutar og sterke oksar. Jorda skal drikka seg utørst av blod og støvet gjødslast med feitt.

⁸ Det er hemnens dag for HERREN, året for gjengjeld i striden om Sion.

⁹Elvane skal bli til bek og støvet til svovel, landet blir til brennande bek.

¹⁰ Korkje dag eller natt skal det slokna, evig skal røyken stiga. Frå slekt til slekt skal det liggja øyde, evig og aldri skal nokon kryssa det.

¹¹ Pelikan og hegre skal eiga det, ugle og ramn skal bu i det. Målesnor og lodd skal strekkjast over det, landet skal bli audt og tomt.

¹²Det finst ikkje stormenn der som kan utropa ein konge, det er ute med alle leiarar.

¹³ I slotta veks det tornekratt, nesler og tistlar i borgene. Landet blir buplass for sjakalar, tilhaldsstad for strutsar.

¹⁴ [101] Hyenar og ørkendyr møtest, bukkar kallar på kvarandre. Lilit slår seg òg til ro der og finn seg ein kvilestad.

¹⁵Små ugler byggjer reir og legg sine egg der, rugar og klekkjer dei ut i skuggen. Falkane samlast der med kvarandre.

¹⁶ Sjå etter i HERRENS bok og les! Ikkje éin av desse skal mangla, ingen skal leita etter dei andre. For HERRENS munn har gjeve påbodet, det er hans Ande som samlar dei,

¹⁷og det er han som har kasta lodd for dei. Med målesnor i handa deler han landet mellom dei. Dei skal ta det i eige til evig tid og bu der frå slekt til slekt.