Read nynorsk 2011 Jesaja 35 Bible Online

Jesaja 35 - nynorsk 2011 bible

Jesaja 35

¹Ørken og tørt land skal gleda seg, øydemarka skal jubla og bløma, som lilja

² skal ho bløma og jubla, ja, ropa av fryd. Libanons herlegdom har ho fått, Karmels og Sarons glans. Dei skal få sjå HERRENS herlegdom, glansen frå vår Gud.

³ Styrk dei slappe hender, gjer dei ustøe knea sterke!

⁴ Sei til dei urolege hjarta: Ver sterke, ikkje redde! Sjå, dykkar Gud! Han kjem med hemn, med gjengjeld frå Gud. Sjølv kjem han og frelser dykk.

⁵ Då skal blinde auge opnast og dauve øyre latast opp.

⁶Då skal den lamme springa som ein hjort, og tunga til den stumme skal jubla. For vatn bryt fram i ørkenen og bekker i øydemarka.

⁷Glødande sand blir til innsjø, det tørste land til kjelder med vatn. Sjakalars buplass blir ein kvilestad der graset gror mellom røyr og siv.

⁸ Og der skal det vera ein veg, Den heilage vegen skal han kallast. På den skal ingen urein ferdast. Han skal vera der for dei. Ingen som går på vegen, sjølv ikkje dårar, skal gå seg vill.

⁹Men der skal det ikkje vera noka løve, rovdyr skal ikkje gå på han, dei skal ikkje finnast meir. Men dei som er løyste ut, skal gå der,

¹⁰ dei som HERREN har fria ut, skal venda attende. Dei kjem til Sion med jubel, med evig glede om si panne. Fryd og glede grip dei, sorg og sukk må flykta.