Read nynorsk 2011 Jesaja 47 Bible Online

Jesaja 47 - nynorsk 2011 bible

Jesaja 47

¹ Stig ned, jomfru, set deg i støvet, dotter Babel! Set deg på bakken utan trone, du kaldear-dotter. For du skal ikkje lenger kallast den fine og bortskjemde.

² Ta handkverna og mal mjøl! Ta sløret bort, lyft slepet opp, blott låra, vad over elvar!

³ Dei skal blotta den nakne kroppen din, di vanære skal bli synleg. Eg tek hemn og skånar ingen.

⁴ Han som løyser oss ut, HERREN over hærskarane er hans namn, Israels heilage.

⁵Sit i stille, gå inn i mørkret, du kaldear-dotter! For du skal ikkje lenger kallast dronning over kongerike.

⁶ Eg vart harm på mitt folk og vanæra eigedomen min. Eg overgav dei i dine hender. Du hadde ikkje miskunn med dei. På den gamle la du ditt tunge åk.

⁷ Du sa: «For all tid skal eg vera evig dronning.» Du tenkte ikkje over korleis dette skulle enda.

⁸Og no, høyr dette, du som lever i overflod, som sit så trygg, som seier i hjartet ditt: «Eg og ingen annan! Eg skal ikkje sitja som enkje eller mista born.»

⁹ Men begge delar skal koma over deg, brått, på ein einaste dag. Barnløyse og enkjestand skal koma over deg i fullt mål trass i dei mange trolldomskunstene dine og den kraftige maninga di.

¹⁰Du var trygg i vondskapen din. Du sa: «Ingen ser meg.» Din visdom og kunnskap førte deg vill, så du sa i hjartet: «Eg og ingen annan!»

¹¹Det vonde skal koma over deg, det kan du ikkje trylla bort. Ulukke skal falla over deg, du kan ikkje sona deg frå henne. Brått kjem øydelegginga over deg, du veit ikkje om henne.

¹²Kom no med di maning og alle trolldomskunstene dine som du har slite med frå du var ung. Kanskje kan du få hjelp, kanskje kan du skremma ulukka bort?

¹³ Du er trøytt av mange slags råd. No får dei koma og frelsa deg, dei som deler inn himmelen, granskar stjernene og månad for månad varslar kva som skal henda deg.

¹⁴Sjå, dei blir som halm, elden brenner dei opp. Dei kan ikkje berga livet frå logane. Dette er ikkje glør til å verma seg ved, bål til å sitja framføre!

¹⁵Slik går det med trollmennene som du har slite for frå du var ung. Dei vinglar kvar til sin kant, det er ingen som frelser deg.